Ե՞րբ դիմել կանանց կոնսուլտացիա. հարցազրույց մանկաբարձ-գինեկոլոգ Մարիամ Հակոբյանի հետ. morevmankan.am

Որքա՞ն հաճախ պետք է հաճախել կանանց կոնսուլտացիա:

Խորհուրդ է տրվում տարեկան 1-2 անգամ այցելել գինեկոլոգի` ընդհանուր հետազոտության նպատակով, ինչպես նաև, անհրաժեշտ է դիմել գինեկոլոգի խորհրդատվության, եթե առկա են անհանգստացնող ախտանշաններ։

Ի՞նչ ֆիզիոլոգիական վիճակների ժամանակ է անհրաժեշտ այցելել կանանց կոնսուլտացիա:

Կանանց կոնսուլտացիա ցանկալի է կամ անհրաժեշտ է հաճախել ո՛չ միայն խնդիրներ ունենալու դեպքում, այլ նաև, երբ պատրաստվում եք կամ սկսել եք ապրել սեռական կյանքով, հղի եք կամ պատրաստվում եք հղիանալ:  

Ինչպիսի՞ ախտաբանությունների և գանգատների դեպքում պետք է անպայման դիմել մասնագետի:

Կան որոշ ախտանշաններ և հիվանդագին վիճակներ, որոնց առկայության դեպքում պետք է անհանգստանալ և դիմել գինեկոլոգի: Դրանք են՝ դաշտանային ցիկլի խանգարումները, երբ ցիկլն ուշանում է կամ չի սկսվում, շուտ է սկսվում, չափազանց առատ է և այլն, երբ առկա են դաշտանադադարի նշաններ, երբ չեք կարողանում հղիանալ:

Անհանգստանալ և մասնագետի պետք է դիմել նաև հետևյալ ախտանշանների դեպքում՝ քոր և այրոց սեռական օրգաններում, արյունահոսություն` ոչ դաշտանային օրերին, ցավ` սեռական հարաբերության ընթացքում կամ` հետո, անտանելի ցավոտ դաշտան, անսովոր, տարօրիանկ հոտով կամ գույնով արտադրություն` հեշտոցից, չափից ավելի փքվածություն` որովայնի ստորին հատվածում, ցավոտ միզարձակում, փոքր կոնքի ու որովայնային շրջանում` ցավեր:

Ի՞նչ ծառայություններ է մատուցում կանանց կոնսուլտացիան:

Գինեկոլոգի աշխատասենյակում իրականացվում է հիվանդ այցելուների ամբողջական հետազոտում և բուժում:

Կոնսուլտացիայի պայմաններում հետազոտման և բուժման ցանկում ընդգրկված են հետևյալ հիվանդությունները.

• կանանց սեռական օրգանների սուր և քրոնիկ բորբոքային հիվանդություններ,
• կոնքային քրոնիկ ցավեր,
• ներարգանդային ախտաբանություն՝ արգանդի միոմա, էնդոմետրիումի պոլիպներ և այլն,
• էնդոմետրիոզ և արտաքին սեռական օրգանների (գենիտալ) էնդոմետրիոզ,
• սեռական օրգանների բարորակ և չարորակ ուռուցքներ,
• վերարտադրողական գործառույթի խանգարումներ (անպտղություն, վիժումներ, արտարգանդային հղիություն),
• ամուսնական զույգի նախապատրաստում` վերարտադրողական օժանդակ տեխնոլոգիաների կիրառմանը (ներարգանդային սերմնավորման՝ ամուսնու կամ դոնորական սերմի կիրառմամբ,  արտամարմնային բեղմնավորման և սաղմի տեղափոխման ՝վերջին 15 տարիների ընթացքում),
• կանանց սեռական օրգանների զարգացման արատներ,
• սկլերոկիստոզային ձվարանների համախտանիշ,
• կոնքի օրգանների իջեցում և արտանկում,
• միզարձակման խանգարումներ:

Ի՞նչ մասնագետներ են ներգրավված կանանց կոնսուլտացիայում:

Կանանց կոնսուլտացիայում ներգրավված են տարբեր մասնագետներ և, համապատասխանաբար, գործում են տարբեր բուժաշխատասենյակներ՝ գինեկոլոգիական, ավանդական բժշկության, ասեղնաբուժության, մանուալ թերապիայի, ռեֆլեքսաթերապիայի, գենետիկայի, ատամնաբուժության, անդրոլոգիայի և էնդոկրինոլոգիայի: Գործում է նաև հոգեբանական ծառայություն:

Ի՞նչ միջամտություններ են իրականացվում:

Իրականացվում է խորհրդատվություն բեղմնականխման բոլոր տեսակների համար: Տարբեր տարիքի կանանց համար բեղմնականխման մեթոդի անհատական ընտրություն է կատարվում (դեռահասներ, կանայք մինչև 35 և ավելի տարիքի)՝ ծննդաբերությունից հետո, հղիության արհեստական ընդհատումից հետո, կերակրող մայրերին, գինեկոլոգիական և էքստրագենիտալ (արտասեռական) ախտաբանությամբ կանանց, շտապ բեղմնականխման կարիք ունեցող կանանց և այլն:

Իրականացվում է հղիության պլանավորում, վարում և մինչհոսպիտալային սկրինինգ (ընտրույթային հետազոտություն) ինչպես առողջ, այնպես էլ՝ տարբեր հիվանդություններ ունեցող կանանց մոտ:

Անցանկալի հղիությունների դեպքում անցկացվում է խորհրդատվություն և հղիության արհեստական ընդհատման մեթոդի ընտրություն (դեղորայքային կամ վիրաբուժական):

Ի՞նչ հետազոտություններ են իրականացվում կանանց կոնսուլտացիայում:

Կանանց կոնսուլտացիայում առկա տարբեր լաբորատորիաներում իրականացվում են հետևյալ հետազոտությունները.  

• ֆունկցիոնալ և կլինիկական ախտորոշում,
• ախտաբանահյուսվածաբանական,
• ցիտոգենետիկ,
• կենսաքիմիական,
• մանրէաբանական,
• հորմոնալ,
• իմունաբանական,
• ռենտգեն
• դենսիտոմետրիա:

Հարցեր, պատասխաններ, մեկնաբանություններ