Կրծքագեղձի քաղցկեղը գրավում է առաջին տեղը կանանց բոլոր տեսակի ուռուցքային հիվանդությունների շարքում. morevmankan.am

Պարբերաբար կրծքագեղձի հետազոտությունը  թույլ է տալիս բացահայտել խնդիրն ամենավաղ փուլում: Թե ինչ պարբերականությամբ և ինչպես է հարկավոր անցնել մամոգրաֆիկ  հետազոտությունը, պարզեցինք ՄՄԱՊԳՀԿ բժիշկ-մամոգրաֆիստ` Ա. Ահարոնյանի հետ զրույցում:

–   Կրծքագեղձի ինչպիսի՞  հետազոտություններ գոյություն ունեն

–   Կրծքագեղձի հետազոտության համար գոյություն ունեն բազմաթիվ ախտորոշիչ մեթոդներ՝ ռենտգեն մամոգրաֆիա, ՈւՁՀ, ՄՌՏ (մագնիսա -ռեզոնանսային տոմոգրաֆիա), ՌԿՏ (ռենտգեն-կոնտրաստային տոմոգրաֆիա): Չնայած տեխնիկական մեծ առաջընթացին կլինիկական զննումը՝ անամնեզը, կրծքագեղձի և անոթափոսերի պալպացիան մեծ նշանակություն ունեն:

–   Հիմնական ախտորոշիչ մեթոդները  ռենտգեն և ՈԻՁ  մամոգրաֆիան է: Ի՞նչ առավելություններ և թերություններ ունեն այդ մեթոդները

–   Ռենտգեն-մամոգրաֆիկ հետազոտության առավելությունները բազմաթիվ են: Նախ՝ շատ ինֆորմատիվ և զգայուն մեթոդ է, որը թույլ է տալիս տեսնել օրգանն ամբողջական տարբեր պրոեկցիաներում:

Հնարավորություն է տալիս տեսնել չշոշափվող գոյացությունները, խմբավորված կրակալումների  առկայությունը, որոնք գնահատվում են որպես  նախաքաղցկեղային իրավիճակ :

Հնարավորություն են տալիս նաև անցկացնել դինամիկ հսկողություն, որի արդյունքում բժիշկը կարողանում է համեմատել նախկին և նոր մամոգրամաները:

Թերություննների մեջ պետք է նշեմ, որ այն ճառագայթային հետազոտություն է և պարունակում է քիչ ինֆորմացիա այն կանանց մոտ, ովքեր ունեն խիտ գեղձային հյուսվածքի գերակշռությամբ կրծքագեղձ: Դա  հիմնականում չծննդաբերած, չկերակրած կանայք են: Այդ պատճառով  նրանց ուլտրաձայնային  հետազոտություն է առաջարկվում: Ուլտրաձայնային հետազոտության առավելություններն են՝ այն ճառագայթային չէ և թույլ է տալիս հետազոտել հղիներին ու կերակրող մայրերին:

Շատ ինֆորմատիվ է տրավմայի և սուր բորբոքումների ժամանակ: Հնարավորություն է տալիս բազմակի անգամ հետազոտել կնոջը բուժման ընթացքում և տարբերակել հեղուկային և հյուսվածքային գոյացությունները:

Թերությունները. սուբյեկտիվ մեթոդ է, հնարավոր չէ տեսնել խմբավորված միկրոկալցիֆիկատների առկայությունը և օրգանն՝ ամբողջական:

–   Ի՞նչ տարիքային սահմանափակումներ կան և ինչպե՞ս պատրաստվել հետազոտությանը:

Ցանկալի է հետազոտությունը կատարել դաշտանային ցիկլի ավարտից հետո մինչ նախադաշտանային իրավիճակը: Հետազոտությունը ցուցված է բոլորին, պարզապես, կախված տարիքից, այն տարբեր է լինում:

Գոյություն ունեն միջազգային ստանդարտներ ՝մինչև 35 տարեկան կանանց կատարվում է ՈՒՁ մամոգրաֆիա,  35 տարեկանից բարձր կանանց կատարվում է և՛ ռենտգեն, և՛ ՈՒՁ մամոգրաֆիա:

Ցավոք, այս հիվանդությունն ունի աճի միտում և շատ երիտասարդացել է: Այդ պատճառով  մոտեցումը պետք է լինի անհատական: Հատկապես  ռիսկային գոտում են գտնվում այն կանայք, ովքեր ունեն գինեկոլոգիական և վահանաձև գեղձի հիվանդություններ կամ անամնեզում ունեն տրավմա և ժառանգական գործոն:

–   Ի՞նչ պարբերականությամբ է պետք կատարել Ռ-մամոգրաֆիկ հետազոտություն
Դասական մոտեցումը հետևյալն է՝ 35-40 տ. կանանաց մեկ անգամ իրականցվում է բազային մամոգրաֆիա, 40-50 տ.՝ երկու տարին մեկ անգամ, իսկ 50 և բարձր՝ պարտադիր տարին մեկ անգամ, անկախ այն հանգամանքից ունի կինը գանգատ, թե՝ ոչ:

Հար է նշել շատ կարևոր մի հանգամանք, որ հետազոտություննների ամբողջ գործընթացը պետք է իրականացնի նույն մասնագետը:

Հարցեր, պատասխաններ, մեկնաբանություններ