Ֆիզիկական ծանրաբեռնվածությունը և մարզումները` հղիության ժամանակ. հարցազրույց Մարիամ Հակոբյանի հետ. morevmankan.am

Ֆիզիկական ակտիվության կարևորությունը` հղիության ժամանակ:
Հղիության նորմալ ընթացքի դեպքում կնոջ համար ֆիզիկական ծանրաբեռնվածությունն անհրաժեշտություն է:
Հղիության ընթացքում մարմնամարզության դրական արդյունքներն ակնհայտ են. այն օգնում է ամրացնել մկանները, լավացնում է արյան շրջանառությունը ներքին օրգաններում, ինչի շնորհիվ պտուղն առատ թթվածին է ստանում: Հղիության ընթացքում մարմնամարզությունն օգնում է նաև կարգավորել շնչառությունը, ինչը հետագայում արդյունավետ ազդեցություն ունի ծննդաբերության ժամանակ:

Հղիության ընթացքում մարմնամարզության վերաբերյալ կա նաև ծայրահեղ կարծիք, համաձայն որի կարելի է շարունակել առանց սահմանափակումների ակտիվ կենսակերպ վարել, քանի որ հղիությունը նորմալ ֆիզիոլոգիական վիճակ է: Սակայն, ինչպես ամեն ծայրահեղություն, դա նույնպես ընդունելի չէ:

Հղիության ժամանակ ֆիզիկական ակտիվության ի՞նչ սահմանափակումներ կան:

Որոշ սահմանափակումներ ցանկալի են յուրաքանչյուր հղի կնոջ համար: Հղիության ընթացքում հակացուցված է ցանկացած ֆիզիկական ծանրաբեռնվածություն, որն ուղեկցվում է մարմնի ցնցումներով, տատանումներով, ծանրություն բարձրացնելով, ընկնելու վտանգով կամ հարվածներով:

Հղիության ընթացքում արգելված է նաև պրոֆեսիոնալ սպորտով զբաղվելը, ինչպես նաև այնպիսի մարզաձևերը, ինչպիսիք են` լեռնագնացությունը, ձիավարությունը, մարտարվեստը, ջրի մեջ թռիչքները և այլն:

Ի՞նչ վտանգներ կարող են առաջանալ ծանրաբեռնվածության հետևանքով:

Լարված և ինտենսիվ ֆիզիկական ծանրաբեռնվածությունը հանգեցնում է արյան շրջանառության վատացման, ինչն էլ դառնում է պտղի դանդաղ, վատ զարգացման պատճառ: Սա կարող է վիժման պատճառ լինել:

Որոշ դեպքերում, սակայն, հղի կնոջը հակացուցված է ցանկացած ֆիզիկական ծանրաբեռնվածություն, օրինակ, երբ առկա է բարդությունների հավանականություն:

Ֆիզիկական ծանրաբեռնվածության թույլատրելի մակարդակը պետք է որոշել բժիշկ-գինեկոլոգի հետ:

Ո՞ր եռամսյակումներում է հղին ավելի զգայուն ֆիզիկական ծանրաբեռնվածության նկատմամբ:

Ֆիզիկական ծանրաբեռնվածության թույլատրելի ինտենսիվությունը տարբեր է` կախված հղիության ժամանակահատվածից և ընթացքից, ինչպես նաև՝ անհատական ֆիզիկական տվյալներից:

Վիժման վտանգի հավանականությունը մեծ է հղիության առաջին եռամսյակում: Այդ շրջանում կանանց խորհուրդ է տրվում ֆիզիկական ակտիվությունը նվազեցնել 70-80 տոկոսով՝ համեմատած մինչև հղիությունն ունեցած ակտիվության հետ:

Ակտիվության ի՞նչ տեսակներ են օգտակար:

Մարզումների լավագույն տեսակներ են համարվում քայլքը, լողը: Մարմնամարզություն ևս անհրաժեշտ է կատարել, բայց քիչ և ոչ ակտիվ, սակայն դրանք պետք է պարբերական բնույթ կրեն՝ շաբաթական, առնվազն, 3 անգամ: Այդպես ավելի արդյունավետ կլինեն, քան երբեմն-երբեմն կատարված երկարատև մարզումները, որոնք միայն վնաս են օրգանիզմին, քանի որ վերջինիս համար կտրուկ ծանրաբեռնվածությունը սթերս է:

Ե՞րբ է ավելի նպատակահարմար զբաղվել մարզումներով:

Մարզումներ կարելի է անցկացնել սնվելուց 2 ժամ անց: Մարզումների ընթացքում պետք է խուսափել ջրազրկումից և գերտաքացումից։

Հարցեր, պատասխաններ, մեկնաբանություններ