Ատամների ախտահարումը և բուժումը հղիության ժամանակ. morevmankan.am

Ինչո՞ւ հղիության ժամանակ հաճախ են ախտահարվում ատամները

Կնոջ առողջական վիճակից և ժառանգականությունից կախված, հղիության ընթացքում ատամները կարող են խիստ տուժել, կամ կարող են մնալ միանգամայն առողջ: Վերջինը հնարավոր է, եթե հղիությունը պլանավորված է, և մինչ այն արդեն կինը զբաղվել է ատամների բուժմամբ:

Ինչո՞ւ է պտուղն այդքան մեծ և, հիմնականում, քայքայող ազդեցություն է ունի կնոջ ատամների վրա: Դրա համար նշվում է մի քանի պատճառ:

• Հորմոնալ ֆոնի փոփոխությունն ազդում է անգամ թքի կազմության վրա, նպաստում է նաև կարիեսի առաջացմանը:
• Հղիության ժամանակ լնդերը ստանում են մեծ քանակությամբ արյուն, որը նրանց դարձնում է ավելի փխրուն և նպաստավոր պայմաններ է ստեղծում մանրէների զարգացման համար: Արդյունքում առաջանում է բերանի խոռոչի բորբոքում, գինգիվիտ, հետագայում՝ պարադոնտիտ և կարիես:
• Տոքսիկոզի հետևանքով կնոջ մոտ լինում են սրտխառնոց և փսխում և նրանցում պարունակվող աղաթթուն բերում է էրոզիայի և ատամների էմալի քայքայման:
• Պտղի ձևավորվող ոսկրային համակարգի համար մեծ քանակությամբ կալցիում է անհրաժեշտ, որը նա ստանում է մոր օրգանիզմից՝ ոսկրերից, ատամներից:

Որպեսզի հղիության ժամանակ կալցիումի պակաս չառաջանա, անհրաժեշտ է ընդունել կալցիումի պատրաստուկներ և օգտագործել լոբազգիներ, ընկուզեղեն, ձավարեղեն, մրգեր, բանջարեղեն, կանաչեղեն, ձու, ձուկ և կաթնամթերք:

Վտանգավո՞ր է, արդյոք, ատամների բուժումը` հղիության ժամանակ

Հղիության ժամանակ ատամները բուժելու հարցն ամենավիճելիներից է:

Սակայն բուժելը համարվում է անհրաժեշտ է, քանի որ ատամների վիճակը խիստ կապված է պտղի զարգացման հետ: Ահա մի քանի ապացույցներ:

• Կարիես առաջացնող մանրէները, համաձայն վերջին հետազոտությունների, կարող են առաջացնել վաղաժամ ծննդաբերություն կամ բերել նորածնի քաշի պակասի: Կնոջ օրգանիզմում այդ մանրէները դրդում են ցիտոկինների արտադրությունը, որոնք առաջացնում են արգանդի կծկումներ:
• Պուլպիտը և պերիոդոնտիտը (կարիեսի բարդությունները) առաջացնում են մանրէների և տոքսինների անցում արյան մեջ, որոնք կարող են հասնել պտղին և վարակել նրան:
• Ատամի ցավը հղիի համար հոգեբանական տրավմա է, որն առաջացնում է հորմոնների քանակի ավելացում, ինչը բացասաբար է անդրադառնում պտղի զարգացման վրա:
• Փչացած ատամից վարակը կարող է անցնել ստամոքս-աղիքային համակարգ և առաջացնել պրեէկլամպսիա՝ ուշ տոքսիկոզ:

Այս փաստարկները բավական են` հասկանալու, որ հղիության ժամանակ ատամներն անպայման պետք է բուժել:

Սակայն ատամների բուժումը ևս անվտանգ չէ.

• հղիության վաղ շրջանում ատամների բուժման ժամանակ օգտագործվող անեսթեզիան կարող է ազդել պտղի հյուսվածքների ձևավորման վրա,
• ատամները բուժելուց հետո՝ կապված իմունիտետի իջեցման հետ, կարող է բարդությունների առաջացման վտանգ լինել,
• հղիության ընթացքում ցավային շեմն իջնում է, որի պատճառով ատամների բուժումն ավելի ցավոտ կարող է լինել:

Կինը պետք է ատամնաբույժին հայտնի իր հղիության մասին, որպեսզի ընտրվի առավել անվտանգ ցավազրկող, կամ որոշվի ատամը բուժելու անհրաժեշտության աստիճանը:

Հարցեր, պատասխաններ, մեկնաբանություններ