Վիժման պատճառների, հղիությունների միջև ընկած ժամանակահատվածի ու հղիության վարման մասին. Մերի Թադևոսյան. morevmankan.am

Med-practic-ի ընթերցողներին հղիության վարման, վիժման պատճառների, հղիությունների միջև ընկած ժամանակահատվածի մասին կներկայացնի և օգտակար խորհուրդներ կտա Մոր և մանկան առողջության պահպանման գիտահետազոտական կենտրոնի բարձր ռիսկի հղիների բաժանմունքի մանկաբարձ-գինեկոլոգ Մերի  Թադևոսյանը:

Երբ արդեն փաստ է հղիությունը. ինչպե՞ս վարվել ներկայացված երևույթների հետ, որոնք մինչ այդ առօրեական էին. կոսմետիկա, բջջային հեռախոս, համակարգիչ, ծխախոտ, ալկոհոլ, սննդակարգեր, ֆիզիկական ակտիվություն, նաև՝ ինչպե՞ս վարվել նոր ի հայտ եկող երևույթների հետ. վաղ տոքսիկոզ, վաղ շրջանի վիժումներ և այլն:

Սրտխառնոց, փսխումներ, գլխապտույտ.

Հաճախ հղիությունն ընթանում է սրտխառնոցներով ու փսխումներով, այս երևույթները  սովորաբար պետք է անցնեն 12-13 շաբաթ հետո, սակայն լինում են դեպքեր, երբ սրտխառնոցներն ու փսխումները սկսվում են  հենց առաջին օրվանից և տևում  մինչև ծննդաբերություն: Դրանց դեմ, իհարկե, կան միջոցներ, որոնք, իսկապես, արդյունավետ են:

Ապրելակերպ. համակարգիչ, բջջային հեռախոս

Հղիության ընթացքում մեր օրգանիզմն ավելի խոցելի է արտաքին ազդակների դեմ:  Պետք է այս ամիսների ընթացքում փոքր-ինչ զգուշավորություն ցուցաբերել: Մենք  չգիտենք, թե ինչ բաղադրություն ունի այն կոսմետիկան, որն օգտագործում ենք, չգիտենք ՍՊԱ կենտրոններում առաջարկվող ծառայությունների որակը՝ ընդհուպ մինչև գործիքների մաքրություն: Համակարգիչն արդեն որոշակի նստելու կեցվածք է պահանջում, որը հղիներին խորհուրդ չի տրվում: Ամենաորակյալ համակարգիչն անգամ ճառագայթներ է արձակում, որը նույնպես վնասակար է հատկապես այս շրջանում: Անկախ աշխատանքի բնույթից՝  պետք է համակարգչից օգտվել հնարավորինս քիչ: Նույնը վերաբերում է նաև բջջային հեռախոսներին: Բջջային հեռախոսների կրումը մարմնին շատ մոտ կարող է բերոել պտղի պահվածքի փոփոխության. պտուղն ավելի անհանգիստ է դառնում և շարժունակ:

Սննդակարգ.

Հղի կինը չպետք է իրեն հիվանդ զգա: Հղիությունը հիվանդություն չէ:  Շատ կարևոր է հղի կնոջ թիմը՝ նրա ընտանիքը և հղիությունը վարող բժիշկը: Ընտանիքում պետք է  կանոնակարգել սնվելու, քնելու, զբոսնելու  ռեժիմը:  Սննդակարգի կարևորագույն բաղադրիչը պետք է դառնա սպիտակուցը: Նախապատվությունը պետք է տալ մսամթերքին, կաթնամթերքին, ձկնեղենին: Պետք է ուտել հաճախ և չափավոր: Շատ կարևոր է նաև, թե երբ և ինչքան հեղուկ խմել: Հեղուկի սահմանափակումը հղիության ընթացքում ճիշտ չէ:  Չի կարելի ջուր խմել անմիջապես ուտելուց հետո և գիշերը՝ քնելուց առաջ: Ջուրը պետք է խմել օրվա ընթացքում հաճախ, բայց՝ փոքր կումերով:

Վիժում. պատճառները

Մեր ժամանակներում անհամեմատ շատացել է վիժումների քանակը: Նախկինում  ընդհատված հղիությունները մենք կապում էինք ներարգանդային վարակների հետ: Վերջին ժամանակներում, մեզ հասած  հետազոտության համաձայն, բժիշկների մեծամասնությունը վիժման պատճառ են համարում տարբեր հիվանդությունները,  մասնավորապես, թրոմբոֆիլիան: Կանգ առնենք թրոմբոֆիլիայի վրա, որը հայտնաբերվում է արյան մեջ որոշակի գեների առկայության դեպքում: Արդյունքում ախտորոշվում է գենետիկորեն  հոմոզիգոտ կամ հետերոզիգոտ թրոմբոֆիլիա, որի հետ են կապում չզարգացող հղիությունը թե՛ մանկաբարձ-գինեկոլոգները, թե՛ արյունաբանները:

Վիժում կարող է լինել հորմոնալ ֆոնի խանգարման հետևանքով, ներարգանդային վարակների արդյունքում: Պատճառները շատ են, պարզապես առաջին իսկ նշանների դեպքում՝ թեթև արյունահոսություն, ցավեր, հարկ է դիմել բժշկի: Երբեմն անհրաժեշտություն է առաջանում հղիությունը պահպանելու համար պայքարել մինչև վերջ: 

Հղիությունների միջև ընկած ժամանակահատվածը

Օրգազնիմը հղիության ընթացքում շատ ռեսուրսներ է  սպառում, ուստի մինչև հաջորդ հղիությունը պետք է վերականգնել տրանսֆորմացիան կամ կորուստը: Արգանդը բազմաթիվ անոթների հետ պետք է վերականգնվի, հղիություն տարած օրգանիզմում պետք է լրացվի կալցիումը, մագնեզիումը, երկաթը: Սրանք այն նյութերն են, որոնք անհրաժեշտ են պտղի զարգացման համար: Կնոջ օրգազնիզմում զարգանում է նոր կյանք, որն, իհարկե, որոշակի պաշարներ է պահանջում: Դադարն անհրաժեշտ է, որպեսզի արգանդը նորից ի վիճակի լինի հղիություն կրելու, որ պտղապարկը բարեհաջող ամրանա արգանդի պատերին:

Օպտիմալ ժամանակահատվածը 1,5- 2 տարին է:  Այս պարագայում բացարձակ նշանակություն չունի, թե որ տարբերակով է ծննդաբերությունը տեղի ունեցել: Շատերը կարծում են, որ կեսարյան հատման դեպքում հղիությունների միջև ինտերվալը պետք է լինի 5 տարի և ավելի: Հատկապես հիմա, երբ կեսարյան հատման տեխնիկան բավականին կատարելագործված է,  նույնիսկ լինում են դեպքեր, երբ վերականգնումն ավելի արագ է տեղի ունենում, քան բնական ճանապարհով ծննդաբերության արդյունքում:

Բժշկի ընտրություն. խորհուրդ

Եթե որոշել եք մասնագիտորեն մոտենալ հարցին, ապա առաջին հերթին հարկ է ընտրել բժշկին: Ցավոք, մենք չունենք բժշկին դիմելու մշակույթ: Ես խորհուրդ կտամ բժշկի ընտրության հարցում հաշվի առնել նաև տվյալ բժշկի աշխատանքային փորձը, գիտելիքները, մոտեցումները, վերաբերմունքը և այն բուժ հաստատությունը, որտեղ նա աշխատում է:  

Կան տեղամասային բժիշկներ, ում վերահսկողությունը շատ ավելի նախընտրելի է, քան բարեկամինը կամ հարևանինը, եթե անգամ նրանք շատ գրագետ են և փորձառու: Բժշկի ընտրությունը ևս պետք է լինի գիտակցված, չէ որ նա նույնպես  պատասխանատու է առողջ պտղի զարգացման ու ծննդաբերության համար:

Հոդվածի առաջին մասը կարդալ հետևյալ հղումով

Հարցեր, պատասխաններ, մեկնաբանություններ