Հղիության և մայրության ուղեցույց (սկիզբը` նախորդ համարներում)

Հղիության 22-րդ շաբաթ

Այս շրջանում հնարավոր է, որ որոշ հղիների մոտ Ֆիզիոլոգիական սակավարյունություն առաջանա, որը նորմալ երևույթ է, բայց, այնուամենայնիվ, խորհրդակցեք բժշկի հետ, որը կնշանակի հատուկ սնունդ կամ երկաթի պատրաստուկներ:

Պտուղը 22-րդ շաբաթում.

քաշը 450 գրամ է, 

երկարությունը` 27-28 սմ 

Պտուղը օրըստօրե ավելի զգայուն է դառնում: Շոշափումը, հպումը նրա համար շրջապատը ընկալելու միջոց է: Նա սկսում է հասկանալ, թե ինչպես են մարմնի տարբեր մասերը հարաբերված միմյանց հետ, ինչպես ծալել թաթիկները և տոտիկները, և եթե ցանկանում է ծծել իր մատը, ապա կարող է այն կամ մոտեցնել բերանին, կամ թեքվել գլխով: 

Հղիության 23-րդ շաբաթ

Հղիության 2-րդ կեսում հղին կարող է ունենալ կծկանքներ: Հղիության զարգացմանը զուգընթաց դրանք կարող են հաճախանալ, որոնք չպետք է շփոթել իսկական ծննդաբերական կծկանքների հետ: 

Պտուղը 23-րդ շաբաթում.

քաշը 500 գրամ է, 

երկարությունը` 27-29 սմ

Չնայած պտուղն արագորեն ճարպ է հավաքում, սակայն նրա գույնը դեռևս կարմրավուն է, քանի որ յուրաքանչյուր շերտ կազմավորվում է ավելի արագ, քան նրա տակ կհասցնի զարգանալ բավականաչափ ճարպային հյուսվածք: Կարմրությունը կապված է մաշկում պիգմենտների կուտակման հետ: Պտուղը շարունակում է կուլ տալ քիչ քանակությամբ հարպտղային հեղուկ և այն հեռացնել օրգանիզմից` մեզի տեսքով: 

Հղիության 24-րդ շաբաթ

Հղիության նորմալ ընթացքի կարևոր ցուցանիշներից է արգանդի հատակի բարձրությունը, որը հղիության 24-րդ շաբաթում ցայքի վերին եզրից հաշված` կազմում է 22-24 սմ:

Պտուղը 24-րդ շաբաթում.

 քաշը 600-650 գրամ է, 

երկարությունը` 30 սմ

Պտղի դեմքը ձևավորված է: Չնայած դեռևս աչքերը փակ են, սակայն իրարից հեռու չեն տեղակայված: Գլխի վրա շարունակում է ձևավորվել մազածածկը: Պտուղը գրավում է ամբողջ արգանդը: Նա արդեն չի կարող շրջվել հարպտղային ջրերում, բայց առաջվա նման բռնվում է պորտալարից և ձեռքերով շոշափում շրջապատը, սկսում է ավելի ու ավելի լավ «լսել» արտաքին աշխարհը, մոր վախը փոխանցվում է նրան: 

Հղիության 25-րդ շաբաթ

Արգանդը մեծացած է այնքան, որ արդեն ճնշում է ստոծանուն, ենթակողային շրջանին և ստամոքսին, որի հետևանքով ստամոքսահյութը ժամանակ առ ժամանակ բարձրանում է դեպի կերակրափող, առաջացնելով այրոցներ` հատկապես շատ ուտելուց հետո: 

Պտուղը 25-րդ շաբաթում.

քաշը 700-750 գրամ է, 

երկարությունը` 30-31 սմ

Արդեն մի քանի շաբաթ է, ինչ լսվում է պտղի սրտի բաբախումը, որը կարելի է լսել ականջը կնոջ որովայնի վրա դնելով: 

Երեխայի սեռն արդեն վերջնականորեն ձևավորված է: Տղայի ամորձիները սկսում են իջնել փոշտ, ձևավորվում է աղջիկների հեշտոցը: Ձեռքի մատները կարող են բռունցք դառնալ: Ձեռքերից որևէ մեկին երեխան տալիս է նախապատվություն: Այստեղից արդեն սկսում են տարբերվել ապագա ձախլիկները և աջլիկները: Մատների վրա լիովին ձևավորված է այն անկրկնելի նախշը, որը լավ հայտնի է դակտիլոսկոպիայի մեջ որպես մատնահետք: Արդեն սկսում է ձևավորվել քնի և աշխուժության ռեժիմը: Իր արթուն լինելու մասին նա «հայտնում» է հրումներով, հատկապես այն ժամանակ, երբ մայրը հանգստանում է:

Հղիության 26-րդ շաբաթ

Մարմնի քաշի ավելացման հետ մեկտեղ կարող են առաջանալ ոտքերի ջղաձգություն, ցավեր իրանի և կոնքի շրջանում, այտուց, փորկապություն և այլն: Նման դեպքում դիմեք կանանց կոնսուլտացիա: 

Պտուղը 26-րդ շաբաթում.

քաշը 750-780 գրամ է,

երկարությունը` մոտավորապես 32-33 սմ

Պտուղը կարողանում է բացել աչքերը, որոնք լրիվ ձևավորված են, աչքերի գույնը վերջնականապես պարզված չէ: Պտուղը լինում է թույլ, նիհար, քանի որ ճարպը կուտակվում է հղիության ավելի ուշ շրջանում: Նա արդեն ունի թարթիչներ, եղունգներ, որոնք շարունակում են աճել: 

Հղիության 27-րդ շաբաթ

Այս ժամկետներում կնոջ արյան մեջ խոլեստերինի քանակն ավելանում է, որը նպաստում է ընկերքի կողմից զանազան հորմոնների, այդ թվում նաև պրոգեստերոնի արտադրության, որի շնորհիվ արգանդի լարվածությունը և կրծքագեղձերի ֆունկցիան կարգավորվում է:

Նորմալ հղիության ժամանակ II եռամսյակում (14-27 շաբաթ) հղիի քաշն ավելանում է 5,5-6,5 կգ-ով, այսինքն` շաբաթական մոտավորապես 0,5 կգ-ով: Հնարավոր է, որ նիհար կանանց քաշն ավելի շատ ավելանա: Ինչպես քաշի ավելացումը, այնպես էլ պակասը սպառնում է պտղի առողջությանը և բարդացնում հղիության ընթացքը: 

Պտուղը 27-րդ շաբաթում.

քաշը 800-900 գրամ է,

երկարությունը` 33-34 սմ

28-29-րդ շաբաթից սկսած պտուղը համարվում է կենսունակ, բայց լրիվ հասունանալու համար պահանջվում է ևս 12-13 շաբաթ: 

Հղիության 28-րդ շաբաթ

Անհրաժեշտ է այցելել բժշկի, որը կնշանակի մի շարք հետազոտություններ: Բացասական ռեզուսպատկանելիության դեպքում որոշվում է հակամարմինների տիտրը, որի բարձր լինելու հետևանքով կարող են առաջանալ տարբեր խնդիրներ ներկա և հետագա հղիությունների ժամանակ: 

Ոսկրերի աճի համար անհրաժեշտ է շարունակել ընդունել կալցիում, ինչպես նաև երկաթի պատրաստուկներ և պոլիվիտամիններ: 

Պտուղը 28-րդ շաբաթում.

քաշը 1000-1200 գրամ է,

երկարությունը` 35 սմ

Այս շրջանում ծնված պտուղը իրավաբանորեն համարվում է անձ` քաղաքացի, որը ենթակա է գրանցման: Գլխուղեղի կեղևն արդեն ունի գալարներ, իսկ ուղեղի քաշը շարունակում է ավելանալ: Գլխի մազերն ավելի են երկարել: Արգանդի խոռոչում նա հաճախ տեղակայված է գլխով դեպի ցած: Եթե տոտիկներով է կամ հետույքով, դեռևս ժամանակ կա, որպեսզի շրջվի գլխով ցած: 

Հղիության 29-րդ շաբաթ

Այս շրջանում կաթնագեղձերից արտազատվում է կաթնախեժ կամ «առաջին կաթը»: Դա կպչուն, ջրային հեղուկ է, որը դառնում է երեխայի առաջին սնունդը ծնվելուց անմիջապես հետո: 

Արգանդն ավելի է մեծանում և սկսում է ճնշել ներքին օրգաններին, ինչպես նաև միզապարկին, որը հանգեցնում է հաճախամիզության:

Պտուղը 29-րդ շաբաթում.

քաշը 1200-1300 գրամ է,

երկարությունը` 36-37 սմ

Պտղի մակերիկամները սկսում են արտադրել անդրոգենանման նյութեր, որոնք շրջանառվում են արյունատար համակարգում և հասնելով ընկերքին` վերածվում էստրոգենի (էստրիոլի): Ենթադրվում է, որ դա է խթանում պրոլակտինի առաջացումն օրգանիզմում:

(շարունակելի)

Հարցեր, պատասխաններ, մեկնաբանություններ