Ամանորի տոնական սեղանի ամենավտանգավոր մթերքը. Սալուտեմ ամսագիր №4

Ամանորի սեղանն օրգանիզմի համար ծանր փորձություն է՝ սեղանին բազմաթիվ խոհարարական գլուխգործոցներ են հայտնվում, որոնց գայթակղությանը դիմանալը պարզապես անհնար է։ Սակայն բժիշկները խորհուրդ չեն տալիս հրապուրվել ալկոհոլով և որոշ ուտեստներով։ Եթե ցանկանում եք տոներին լավ զգալ, պետք է պահպանեք ճիշտ սնվելու մի քանի կանոն։

Սննդաբանները խորհուրդ են տալիս հրաժարվել երշիկեղենից և տարատեսակ պահածոներից։ Այս մթերքներում շատ բարձր է աղի պարունակությունը, որը դժվարացնում է օրգանիզմից ջրի հեռացումը։

Բժիշկները կազմել են 5 ամենավնասակար տոնական մթերքի ցանկը և նշել են, թե ինչը որի հետ չարժե համատեղել։

Հինգերորդ տեղում մանդարինն է

Առանց մանդարինի Ամանորը տոն չէ։ Բժիշկները ոչինչ չունեն ցիտրուսների դեմ, դրանք համեղ են, օգտակար, ոչ կալորիական։ Սակայն մանդարինը մի առանձնահատկություն ունի. բացասաբար է ազդում ստամոքսի և աղիների լորձաթաղանթի վրա, ուստի մարսողական համակարգի խնդիրների դեպքում մանդարին պետք է ուտել շատ քիչ քանակությամբ։

Անգամ եթե Ձեր ստամոքսն առողջ է, մանդարինը չի կարելի խառնել այլ մթերքների հետ և ուտել ամեն ինչի հետ։ Հիմնական ուտեստներից հետո ստամոքսում հայտնվելով` մանդարինը «սպասում է» մինչև մարսվում է յուղոտ միսը, որի ընթացքում «թափառում է» և ամեն կերպ վատացնում Ձեր վիճակը՝ առաջացնելով որովայնի փքվածություն, տհաճ գղտոց։

Եթե ձմեռային տոները չեք պատկերացնում առանց մանդարինների, ցանկալի է դրանք ուտել խնջույքի ամենասկզբում։

Չորրորդ տեղում յուղոտ միսն է

Ամբողջական խոճկորը կամ խոզի ազդրամիսը հյութալի են, յուղոտ, խռթխռթան, և այդպիսի ուտեստներից ախորժակը գրգռվում է։ Հենց սա էլ գլխավոր վտանգն է. ամեն ստամոքս չի մարսում մեծ քանակությամբ յուղոտ սնունդ։ Հարկ է մտածել յուղոտ միսը հնդկահավի, ճագարի կամ հավի մսով փոխարինելու մասին։ Մսային ուտեստները ցանկալի է մատուցել թարմ բանջարեղենի և ոչ կարտոֆիլի կամ բրնձի հետ։

Երրորդ տեղում շամպայնն է

Ավանդաբար տոնը սկսվում է մեկ բաժակ շամպայնով։ Ամեն ինչ լավ կլինի, եթե սահմանափակվենք 1-2 բաժակով, որից հետո կարող է այրոց առաջանալ, հատկապես, եթե շամպայնին հաջորդի չոր գինին։ Սակայն երբեմն հարկ է լինում շարունակել։ Նման դեպքերում 1 բաժակ շամպայնով նոր տարվա գալուստը շնորհավորելուց հետո կարելի է ընտրել թեթև ըմպելիք, օրինակ` կարմիր կիսաքաղցր գինի, որը քիչ կալորիական է։

Երկրորդ տեղում մայոնեզն է

Մայոնեզն անփոխարինելի է տոնական սեղանի աղցանների համար, սակայն բժիշկները խորհուրդ են տալիս այն փոխարինել այլ թանձրուկներով։ Թերևս մայոնեզն ամենակալորիական մթերքն է Ամանորի սեղանին, որը նաև արագ թթվում է։ Եթե, այնուամենայնիվ, չեք կարողանում հրաժարվել մայոնեզից, ընտրեք ամենաթեթևը և ավելացրեք միայն աղցաններից մեկին։ Մայոնեզային աղցանները պետք է սեղանին դնել փոքր չափաբաժիններով և ուտել խնջույքի սկզբում։

Առաջին տեղում թունդ ալկոհոլը և ալկոհոլային կոկտեյլներն են

Ամանորյա տոներին չարաշահման փուլն անցնելու առումով և թունավորումների քանակով բժիշկները «չեմպիոն» ալկոհոլն են համարում: Տոնական սեղանի շուրջը ամենատարածված սխալը համարվում է ալկոհոլի և գազավորված ըմպելիքների միաժամանակյա օգտագործումը։ Որոշակի վտանգ են ներկայացնում նաև ալկոհոլային կոկտեյլները, որոնք քողարկում են ըմպելիքի համը։ Դրանց չարաշահման հետևանքով արբեցումն արագ է վրա հասնում, իսկ խումարն ավելի ծանր է ընթանում։

Գերադասելի է խմել մեկ տեսակի ոգելից խմիչք՝ չափավոր քանակությամբ, առանց խառնելու և այլ ըմպելիքների հետ համակցելու։

https://replyua.net

«ՍԱԼՈՒՏԵՄ» առողջ ապրելակերպի ամսագիր
Պետական գրանցման համար․ 211․200․00969
[email protected]
+(374) 91 64 10 15
+(374) 98 79 15 15

Հարցեր, պատասխաններ, մեկնաբանություններ