Ուրվագծվում են համագործակցության նոր եզրեր

ՀՀ առողջապահության նախարար Դերենիկ Դումանյանը վերջերս ընդունեց Հայաստանի Հանրապետությունում Իտալիայի արտակարգ և լիազոր դեսպան Բրունո Սկապինիին և մարդասիրական առաքելությամբ Հայաստանում գտնվող «ONLIUS CARDIO-TUSCANIA» թիմի անդամներին:

Ինչպես ներկայացրեցին դեսպանը և թիմի ղեկավար Կարլո Բարզագին, Պիզայի համալսարանական կլինիկայի սրտային փորձառու վիրաբույժներից, անզգայացնողներից և այլ մասնագետներից կազմված թիմի անդամներն այցելել են Հայաստանում գործող սրտաբանական մի շարք կլինիկաներ: Նրանք նշեցին, որ Երևանում սրտային վիրաբուժությունը բավական բարձր մակարդակի վրա է գտնվում և տպավորվել են հատկապես «Նորք-Մարաշ» բժշկական կենտրոնի մասնագիտական մակարդակով և արդյունքներով: Իտալացի բժիշկները ծանոթացել են նաև Գյումրու նորակառույց բժշկական կենտրոնի հնարավորություններին, ականատես են եղել, որ ժամանակակից սարքավորումներով հագեցած կլինիկայի ծառայություններից օգտվում են ոչ միայն Հայաստանի հյուսիսային տարածաշրջանի, այլև Վրաստանի քաղաքացիները:

Նախարարը տեղեկացրեց, որ Ֆրանսիացի մեր հայրենակիցների ջանքերով Գորիսում բացվելու է սրտաբանական ժամանակակից նոր կենտրոն, որի ծառայություններից, կօգտվեն ինչպես Սյունիքի, այնպես էլ` Լեռնային Ղարաբաղի բնակչությունը: Նա նշեց, որ սրտաբանության ոլորտը հանրապետության նախագահի և Կառավարության ուշադրության կենտրոնում է: Եկող տարվանից կավելացվի այն խմբերի ցանկը, որում ընդգրկվածների սրտի վիրահատության ծախսերը կհոգա պետությունը:

Իտալացի գործընկերները նախարարին առաջարկեցին առաջիկայում համատեղ քննարկել և որոշել, թե հատկապես ինչպիսի աջակցություն կնախընտրի Հայաստանը` սրտաբանության բնագավառում:

Հարցեր, պատասխաններ, մեկնաբանություններ