Տհաճ «անակնկալ» Վաղաժամ սերմնաժայթքում. անհանգստացնում է տղամարդկանց, զայրացնում՝ կանանց

Տղամարդկանց սեռական խանգարումների մեջ վաղաժամ սերմնաժայթքումը (ejaculatio praecox) գերակշիռ տեղ է զբաղեցնում: Ըստ սեքսոլոգիական ուսումնասիրությունների` այս խնդրին պարբերաբար կամ մշտապես բախվում է տղամարդկանց մոտավորապես 30 տոկոսը:

Գրեթե բոլոր տղամարդիկ իրենց առաջին սեռական հարաբերությունն ավարտում են վաղ սերմնաժայթքմամբ: Պատանեկության շրջանում նմանատիպ սեռական դրսևորումը համարվում է նորմալ, թեև սուբյեկտիվ գնահատականը, որ հաճախ տրվում է նմանատիպ դեպքերում, երբեմն կարող է ծայրաստիճան բացասական լինել և անհանգստության առիթ դառնալ: Պատանին պարզապես չի կարողանում կառավարել սերմնաժայթքումը, հատկություն, որը զարգանում է սեքսուալ փորձառության աճի հետ և որոշակի ժամանակ է պահանջում: Ինչևիցե, շատ տղամարդկանց համար սերմնաժայթքման կառավարումն այդպես էլ մնում է անհասանելի հմտություն, և վաղաժամ սերմնաժայթքումը նրանց սեռականության դրսևորման սովորական ստերեոտիպն է դառնում: 

Կանանց կարծիքով` այդ երևույթը հիվանդագին խնդիր է, որը զուգընկերների միջև երկխոսության բացակայության պայմաններում կործանում է հարաբերությունները: Տղամարդիկ, ովքեր բախվում են այս խնդրին, չեն ցանկանում այդ մասին խոսել` մտավախություն ունենալով դրանով խորացնել իրավիճակը: Կանայք նույնպես հաճախ նախընտրում են լռել` զուգընկերոջը կամ ամուսնուն նվաստացումից պաշտպանելու ցանկությունից մղված: Նրանց խանգարում է ամոթխածությունը կամ նրբանկատությունը` անկողնային հարցերը զուգընկերոջ հետ քննարկելու համար: 

Վաղաժամ սերմնաժայթքման տարատեսակներից է վաղաժամ նախադռնային սերմնաժայթքումը (ejacuculatio ante portas), որը տեղի է ունենում ներհրման պահին կամ մինչև առնանդամի ներհրումը հեշտոցամուտք: Նման վիճակի բացասական կողմերից մեկը սեռական բավարարման անլիարժեքությունն է, կամ բացակայությունը, ինչը կարող է ժամանակի ընթացքում հանգեցնել միջանձնային փոխհարաբերությունների խանգարման: Կարող է տուժել նաև հղիանալու գործընթացը, քանի որ սերմնաբջիջը ձվաբջջին պարզապես կարող է չհասնել: 

Վաղաժամ սերմնաժայթքման հաճախ հանդիպող պաճառներից մեկը անկանոն սեռական կենսակերպն է, որն առավել բնորոշ է երիտասարդներին` մշտական զուգընկերուհի չունենալու կամ ամուսնացած չլինելու պատճառով: Որքան անկանոն է տղամարդու սեռական կենսակերպը, այնքան արտահայտված կլինի սեռական ակտը վաղաժամ ավարտելու նրա հակումը: Եթե անձը կանոնավոր սեռական կյանքով չի ապրում, ապա վաղաժամ սերմնաժայթքումը հիվանդություն չի համարվում: 

Կարևոր է հաշվի առնել նաև անձի հոգեբանական տիպը: Էմոցիոնալ, անկայուն բնավորություն ունեցող տղամարդիկ ավելի շատ են հակված վաղաժամ սերմնաժայթքման: Սեռական ակտը հաջողությամբ ավարտելու և էրեկցիան (պոտենցիան) պահպանելու ցանկությունը կարող է հանգեցնել անհաջողության մատնվելու վախին, երբ տղամարդը մտածում է միայն մեկ բանի մասին.Արդյո՞ք ես կլինեմ բարձրության վրա: 

Սովորաբար առօրյայում արագաշարժ, շտապող տղամարդիկ անկողնում նույնպես նմանատիպ սեռական վարքագիծ են դրսևորում:

Եթե սեռական առաջին փորձը տղամարդու համար անհաջող է եղել, նրա մոտ կարող է զարգանալ ռեֆլեկտոր արգելակում: Սեռական սխալ դաստիարակությունը կամ ծաղրի առարկա դառնալը կարող են նորից ու նորից անհաջողության ու վախի զգացում առաջացնել` դառնալով վաղաժամ սերմնաժայթքման պատճառ:

Նախադռնային սերմնաժայթքման պատճառ կարող է դառնալ կնոջ չափազանց սեքսուալ և գրգռող վարքագիծն անկողնում, ինչպես նաև երկարատև փաղաքշանքներն ու շոյանքները: Այդ իսկ պատճառով ցանկալի չէ, որ սիրախաղը տևական լինի: 

Վաղաժամ սերմնաժայթքման օրգանական պատճառներից է, մասնավորապես, միզասեռական համակարգի` շագանակագեղձի, միզուղիների բորբոքային պրոցեսները, սեռավարակները: 

Վաղաժամ սերմնաժայթքման հիմքում կարող է որևէ հոգեբանական խնդիր չլինել: Այս դեպքերում կարելի է խոսել զուտ սեռական մարզվածության բացակայության մասին. այն կապված է ավելի խորը ներանձնային և միջանձնային խնդիրների հետ:

Կա ևս մի այլ ենթադրություն, ըստ որի իբրև թե վաղաժամ սերմնաժայթքումը ծառայում է որպես գործիք` կանանց նկատմամբ թշնամանք տածող տղամարդկանց համար: Այս միջոցով նրանք կարծես վրեժ են լուծում` կնոջը զրկելով հաճույքից: 

Հոգեվերլուծության տեսանկյունից վաղաժամ սերմնաժայթքումը ամորձատման բարդույթի դրսևորում է: Այս դեպքում հեշտոցը դիտարկվում է իբրև սպառնացող և սարսափ ներշնչող օրգան, իսկ վաղ սերմնաժայթքումը այն միջոցը, որի շնորհիվ կարելի է հնարավորինս շուտ դադարեցնել սեռական ակտը: Կլինիկական փորձը վկայում է, որ այս երևույթի հետ բախվող տղամարդկանց հոգեբանական խնդիրները միանման չեն: Կարելի է հանդիպել կանանց նկատմամբ ինչպես ջերմ և սիրագորով, այնպես էլ` թշնամական վերաբերմունքով տղամարդկանց. զուգընկերուհիները նույնպես տարբեր կարող են լինել: Այս պատճառով յուրաքանչյուր դեպքում հարկավոր է անցկացնել հոգեբանական և միջանձնային հարաբերությունների վերլուծություն` ցուցաբերելով անհատական մոտեցում:

Հաճախ վաղաժամ սերմնաժայթքումը զուգընկերուհու/կնոջ մոտ դժգոհություն է առաջացնում և միջանձնային խնդիրների պատճառ դառնում: Նման իրավիճակում տղամարդն ապրում է ամոթի, նսեմացման զգացում: Նրա զուգընկերուհին սկզբում կարող է շփոթմունքի մեջ հայտնվել` իրեն մեղավոր համարելով իրավիճակի կապակցությամբ, սակայն ավելի հաճախ կանայք, հատկապես սեռական հարցերում տեղեկացվածները, հուսախաբության զգացում են ունենում, դառնում անհամբեր և զայրացկոտ: Դա ավելի է ուժեղացնում տղամարդու տագնապը և խորացնում սեռական խանգարումը: Վաղաժամ սերմնաժայթքում ունեցող գրեթե բոլոր տղամարդիկ տագնապի զգացում ունեն, որն այս խանգարման առանցքային նախապայմանն է: Կայանալիք սեռական հարաբերությունը թե´ տղամարդու, թե´ կնոջ մոտ վատ նախազգացում է առաջ բերում, իսկ սեռական ակտիվությունն ավարտվում է անբավարարվածության զգացումով: Որպես հետևանք` կարող է առաջանալ սեռական ցանկության նվազում, որոշ դեպքերում խանգարվում է էրեկցիան, իսկ երբեմն էլ սեռական հարաբերությունից խուսափելու միտում է զարգանում:

Երկարատև սեռական ձեռնպահությունը նույնպես կարող է վաղաժամ սերմնաժայթքում առաջացնել: 

Բուժումը իրականացվում է դեղորայքային բուժման և հոգեթերապիայի համակցմամբ: 

Սեռական ակտի տևողությունը կարելի է երկարացնել` օգտագործելով հատուկ քսուքով պահպանակներ: Արդյունավետ է նաև սերմնաժայթքման կառավարման «ստոպ-ստարտ»մեթոդը: Այն բավական պարզ մեխանիկական եղանակ է. տղամարդը, զգալով սերմնաժայթքման մոտեցումը, զուգընկերուհուն հասկացնում է այդ մասին: Զուգընկերուհին պետք է ամուր սեղմի առնանդամի հիմքը: Մեխանիկական սեղմումը խոչընդոտում է սերմնաժայթքմանը: Այս վարժությանը հաջորդում է մյուս «ստոպ-ստարտ»-ը, երբ տղամարդը փոխում է շարժումների ռիթմը և կարող է նույնիսկ դրանք ընդհանրապես դադարեցնել` կախված գրգռվածության աստիճանից: 

Շատ կարևոր է միջանձնային ներդաշնակ մթնոլորտի առկայությունը, քանի որ կնոջ հոգատար և համբերատար վերաբերմունքը նպաստում է վաղաժամ սերմնաժայթքում ունեցող ամուսնու արագ և արդյունավետ բուժմանը: 

Հարցեր, պատասխաններ, մեկնաբանություններ