Ծննդաբերություն

Ծննդաբերությունը նորմալ ֆիզիոլոգիական պրոցես է, երբ պտուղը ծննդաբերական ուղիներով արտամղվում է պլացենտայի, պտղաջրերի, պտղաթաղանթների հետ մեկտեղ: Այն համարվում է նորմալ, երբ սկսվում և ավարտվում է ինքնուրույն, առանց միջամտության ու բարդության, 38-41-րդ շաբաթական ժամկետում: 

Ծննդաբերությունը սկսվելուց մեկ շաբաթ առաջ պտղի գլուխն իջնում է դեպի արգանդի ստորին հատված, ճնշում մկանների, կապանների և նյարդերի վրա, սկսում են թույլ ցավեր, հաճախամիզություն, նկատվում են կնոջ քաշի պակասում, լորձային խցանի հեռացում: Այս բոլորը նախածննդաբերական նշաններ են:

Տարբերում են ծննդաբերության 3 շրջան` բացման (լատենտ և ակտիվ ենթափուլեր), արտամղման և ընկերքային: 

Պտղի ծնվելու համար անհրաժեշտ է, որ արգանդի վզիկը կարճանա, լայնանա և լրիվ բացվի: Լատենտ շրջանը վզիկի նախապատրաստման, ակտիվը` դրա բացման, լայնացման փուլն է: Այնուհետև սկսվում է պտղի արտամղման փուլը, որն ընթանում է կծկանքներով:

Պտուղը ծնվում է բեղմնավորումից 9 օրացուցային կամ 10 մանկաբարձական ամսից, կամ 280 օրից հետո: Այսպիսով, ծննդաբերությունը սկսվում է կանոնավոր կծկանքներով, որոնք բերում են արգանդի վզիկի բացման: Երկրորդ շրջանում ճիգերի և կծկանքների օգնությամբ պտուղը արտամղվում է: Երրորդ շրջանում ընկերքն անջատվում է, և երեխան ծնվում է:

Ծննդաբերության սկիզբ ազդարարում են կանոնավոր, պարբերաբար կրկնվող կծկանքները (սկզբում 20-25, այնուհետև` յուրաքանչյուր 1-2 րոպեն մեկ): 

Առաջին շրջանն ամենաերկարն է, տևում է 12-24 ժամ առաջնածինների և 7-12 ժամ` կրկնածինների մոտ: Այն ֆիզիկապես և հոգեպես ամենածանր շրջանն է: Կծկանքների ժամանակ ցավերը մեղմելու համար հղին կարող է ազատ տեղաշարժվել, ընտրել առաջարկվող դիրքերից այն, որն ավելի հարմար է իրեն: Երկրորդ շրջանը տևում է մոտավորապես 40-50 րոպե առաջնածինների, 25-30 րոպե` կրկնածինների համար: Երրորդ շրջանը տևում է մինչև 30 րոպե:

Արգանդի վզիկի բացվելուց հետո առաջանում են ճիգեր: Պտղի գլուխն իջնելիս ուժեղ սեղմում է աղիքին: Ամեն նոր ճիգի և կծկանքի դեպքում գլուխն ավելի ու ավելի է երևում սեռական ճեղքից և դադարի ժամանակ այլևս հետ չի գնում:

Ավանդական ծննդաբերական մահճակալին մեջքով պառկած դիրքից բացի, առաջարկվում են բազմաթիվ` օրինակ, կիսանստած, կքանստած, կանգնած, կիսապառկած, կողքի վրա պառկած և այլ դիրքեր: 

Երբ գլուխը վերջնականապես արտամղված է, մանկաբարձուհին կարող է ընդունել նորածնին: Այս փուլում կինը պետք է թուլացնի ճիգերը, շնչի խորը և հաճախակի, որոնք նպաստում են շեքի ձգմանը, և պատռվածքներ չեն առաջանում: Վերջապես երեխան ծնվում է, նրա մաշկը լինում է վարդագույն և պատված առաջնային քսուքով:

Մինչ ընկերքի անջատումը կարող է անցնել 5-30 րոպե: Ծննդաբերության ժամանակ կնոջ արյան ֆիզիոլոգիական կորուստը կազմում է 250-400մլ:

Ներկայումս հղի կինն ունի ինչպես և որտեղ ծննդաբերելու ընտրության մեծ հնարավորություն: Պետք է ծննդաբերել ծննդօգնության ստացիոնար հիմնարկում, քանի որ դա ապահով է, որտեղ հնարավոր է ստուգել պտղի վիճակը, կանխել շեղումները:

Ծննդօգնության շատ հիմնարկներում կան ծննդաբերական կահավորված սենյակներ, որտեղ տիրում է բնական մթնոլորտ և որը թույլ է տալիս կնոջը հանգիստ զգալ ծննդաբերության ընթացքում:

Ցանկացած դեպքում տանը ծննդաբերելը կարող է սպառնալ և մոր, և մանկան կյանքին, քանի որ յուրաքանչյուր ծննդաբերության ժամանակ կարող են առաջանալ բարդություններ:

Ծննդատուն գնալիս ցանկալի է վերցնել երկու ներքնաշոր, երկու գիշերանոց, մեկ խալաթ և մեկ զույգ հողաթափ, սրբիչ, ներդիրներ, սանհիգիենիկ պարագաներ (օճառ, ատամի մածուկ ու խոզանակ, սանր և այլն), ցանկության դեպքում` հագուստ երեխայի համար (տակաշոր, միջադիր, շապիկ), անկողնային սպիտակեղեն: 

Հարցեր, պատասխաններ, մեկնաբանություններ