ԵՊԲՀ. Բժշկական հանցագործությունների մասին իրազեկվածության կարևորությունը՝ մասնագետների ուշադրության կենտրոնում

Բժշկական հանցագործությունների մասին իրազեկվածության կարևորությունը՝ մասնագետների ուշադրության կենտրոնում

«Առողջապահության բնագավառի իրավական կարգավորումների արդի հիմնահարցերը» խորագրով կրեդիտավորված քառօրյա անվճար դասընթացների շարքը շարունակվեց «Հերացի» թիվ 1 հիվանդանոցային համալիրում՝ համալսարանական և Արցախի Հանրապետությունից տեղափոխված ավագ և միջին բուժաշխատողների համար:

ԵՊԲՀ առողջապահական իրավունքի խմբի դասախոս, դոցենտ Նաիրա Զոհրաբյանը ներկայացրեց «Բժշկական քրեական իրավունք» թեման:

«Նման միջոցառումների հիմնական նպատակն է կանխել այն հանցագործությունները, որոնք բժիշկները կարող են կատարել ինչպես անփութությամբ, այնպես էլ դիտավորությամբ: Մենք հիմա շատ առաջադեմ օրենսգիրք ունենք, որի իրազեկվածությունը բժիշկներին զերծ է պահելու, նվազեցնելու է այդ հանցագործությունների կատարումից»,-նշում է Առողջապահական իրավունքի խմբի դոցենտը՝ հավելելով, որ քրեական իրավունքը միայն նրա համար չէ, որ պատժի, այլև նրա համար է, որ կանխարգելի:

Նաիրա Զոհրաբյանի խոսքով՝ նման հանցագործություններից են, օրինակ, հղիության արհեստական ընդհատումները, փոխպատվաստումները, վտանգի մեջ թողնելը, իմունային անբավարարության վիրուսով վարակելը, կլոնավորելը, «եվգենիկական փորձերը» և բազմաթիվ այլ բժշկական հանցագործություններ:

Դասախոսությունը անցկացվեց ինտերակտիվ ձևաչափով, հարցուպատասխանով և դեպքերի քննարկմամբ:

Դասախոսությունների շարքը կամփոփի Առողջապահական ծրագրերի ազգային գիտահետազոտական կենտրոնի ղեկավար, Հանրային առողջության և առողջապահության կազմակերպման ամբիոնի ավագ դասախոս Դավիթ Մելիք-Նուբարյանը` «Խտրականության դրսևորումներն առողջապահության բնագավառում և դրանց կանխարգելմանն ուղղված իրավական կարգավորումները» թեմայով:

Նշենք, որ ավագ և միջին բուժաշխատողներին կտրամադրվի 5 տեսական ՇՄԶ կրեդիտ:

Հարցեր, պատասխաններ, մեկնաբանություններ