ՀՀ ԱՆ. Քննարկվել են մարդասիրական օգնությամբ ստացվող դեղերին վերաբերող հարցեր

Առողջապահության նախարարի տեղակալ Անահիտ Ավանեսյանը հանդիպել է «Հայաստան-Արցախ» հիմնադրամի հայաստանյան ներկայացուցիչ Համբարձում Սիմոնյանի, Երևանի քաղաքապետարանի և մարզպետարանների առողջապահության վարչությունների պետերի հետ:

Ոլորտի պատասխանատուները քննարկել են մարդասիրական օգնության ճանապարհով ստացված դեղերի և բժշկական նշանակության ապրանքների պատվիրման, ստացման, տեղափոխման, բաշխման և դրանց վերաբերյալ հաշվետվությունների տրամադրման գործընթացի արդյունավետությունը բարձրացնելու վերաբերյալ հարցեր:

Նախարարի տեղակալը կարևորել է «Հայաստան-Արցախ» հիմնադրամի կողմից մարդասիրական օգնության ճանապարհով տրամադրվող դեղերի և բժշկական նշանակության ապրանքների հասանելիությունը, ինչը ծառայում է մեր բնակչության բժշկական օգնության և սպասարկման պատշաճ իրականացմանը:

Համբարձում Սիմոնյանը նշել է, որ ներկայումս առողջապահության նախարարության հետ համատեղ աշխատանքներ են տարվում բարեգործական ծրագրերն էլ ավելի նպատակային դարձնելու ուղղությամբ` ապահովելով հատկացվող դեղերի շարունակականությունը:

Ներկաները պարտավորվել են տեղերում ուժեղացնել վերահսկողությունը` մարդասիրական օգնության ճանապարհով ստացված դեղերի և բժշկական նշանակության ապրանքների բնակչությանը տրամադրման արդյունավետությունը բարձրացնելու ուղղությամբ:

Հարցեր, պատասխաններ, մեկնաբանություններ