ՀՀ ԱՆ. Օրակարգում` երեխաների և դեռահասների առողջության հարցերը

Առողջապահության համաշխարհային կազմակերպության (ԱՀԿ) և ՀՀ առողջապահության նախարարության 2016-2017թթ. երկամյա համագործակցության համաձայնագրով «Վերարտադրողական, մայրական, նորածնային, երեխաների և դեռահասների առողջություն» ծրագրային միջոցառումների շրջանակներում նախատեսված է ԱՀԿ փորձագիտական աջակցություն` երեխաներին և դեռահասներին մատուցվող ծառայությունների որակի բարելավմանն ուղղված նախարարության կողմից իրականացվող աշխատանքներին։ Այդ   առաքելությամբ Հայաստանում է ԱՀԿ եվրոպական տարածաշրջանային գրասենյակի երեխաների և դեռահասների առողջության ծրագրի ղեկավար Մարտին Վեբերը։ ՀՀ ԱՆ մոր և մանկան առողջության պահպանման վարչության աշխատակիցների, այդ խնդիրներով զբաղվող փորձագետների, ծրագրերի համակարգողների հետ հանդիպման ժամանակ միջազգային փորձագետի հետ քննարկվեցին Երեխաների և դեռահասների առողջության (ԵԴԱ) պահպանման ազգային նոր ռազմավարությունը և 2016-2020թթ. գործողությունների ծրագրի նախագիծը։

Մոր և մանկան առողջության պահպանման վարչության պետ Կարինե Սարիբեկյանը ներկայացրեց, որ ազգային նոր ռազմավարությունը մշակելիս մասնագետները հաշվի են առել երեխաների և դեռահասների շրջանում առողջական առկա խնդիրները, հիվանդացության և մահացության ցուցանիշները, ինչպես նաև այդ ոլորտին առնչվող միջազգային փաստաթղթերի դրույթները։

Քննարկվեցին նաև դեռահասների առողջության և դպրոցական առողջության ծառայություններին վերաբերող, ինչպես նաև երեխաների խնամքին և զարգացմանն առնչվող այլ հարցեր։

Անդրադարձ կատարվեց հանրապետությունում  կազմակերպված դպրոցահասակ երեխաների առողջական վարքագծի հերթական հետազոտության (HBSC) արդյունքներին։ 

Հանդիպման առանցքում էին  նաև երեխաների  հիվանդանոցային օգնության բարելավման և մանկական հիվանդությունների ինտեգրացված վարման (ՄՀԻՎ)  ռազմավարության հետագա ներդրման հետ կապված հարցերը։

Առաքելության ավարտին Մարտին Վեբերը կներկայացնի փորձագիտական գնահատման և հետագա զարգացումներին ուղղված ամփոփ առաջարկություններ։

Հարցեր, պատասխաններ, մեկնաբանություններ