ՀՀ ԱՆ. Սևծովյան տնտեսական համագործակցության անդամ երկրներն առողջապահական հարցեր են քննարկում

Սևծովյան տնտեսական համագործակցության (ՍԾՏՀ) անդամ երկրների  առողջապահության նախարարների  Մոսկվայում  այսօր կայացած հանդիպման ընթացքում քննարկվեցին առողջապահությանը և դեղագործությանն առնչվող մի շարք հարցեր: Օրակարգում էին «Դեղերի որակի երաշխավորման բնագավառում տեղեկատվության փոխանակման և համագործակցության մասին»  Փոխըմբռնման հուշագրի և «ՍԾՏՀ տարածքի սանիտարական պաշտպանության բնագավառում համագործակցության մասին» Համաձայնագրի նախագծերի ստորագրման հարցերը: ՍԾՏՀ անդամ երկրների ներկայացուցիչները  երկխոսություն են ծավալել ինչպես համաշխարհային առումով վտանգ ներկայացնող, այնպես էլ տարածաշրջանին հուզող առողջապահական խնդիրների վերաբերյալ:

Կարևորվել են վարակիչ և ոչ վարակիչ հիվանդությունների կանխարգելման, առողջ ապրելակերպի համար համապատասխան պայմանների ստեղծման, դեղերի շրջանառության վերահսկման, դեղերի որակի երաշխավորման և տարածաշրջանի սանիտարական պաշտպանության խնդիրները:

«ՍԾՏՀ անդամ երկրները` լինելով հարևաններ, առողջապահական նմանատիպ խնդիրներ ունեն, որոնց լուծումը համատեղ գործողություններ է պահանջում»,-իր ելույթում նշել է ՀՀ առողջապահության նախարարի տեղակալ Գագիկ Միրիջանյանը։ Նա նաև կարևորել է դեղերի որակի, արդյունավետության և անվտանգության համատեղ ապահովումը։

Այս հանդիպումը կնպաստի երկրների դիրքորոշումների մերձեցմանը և առողջապահության բնագավառում ուղեցուցային տեղեկություններ կտրամադրի  ՍԾՏՀ արտաքին գործերի նախարարների առաջիկա հանդիպման համար:

Նախատեսվում է ընդունել համապատասխան հռչակագիր:

Հարցեր, պատասխաններ, մեկնաբանություններ