ՀՀ ԱՆ. Քննարկվեցին Շիրակի մարզի առողջապահական խնդիրները

ՀՀ առողջապահության նախարար Արմեն Մուրադյանի մոտ տեղի ունեցած աշխատանքային խորհրդակցության ժամանակ քննարկվեցին Շիրակի մարզի առողջապահական խնդիրները։ Նախարարին ներկայացվեցին ինչպես մարզի առողջապահական կարևոր ցուցանիշները, մասնագետներով և սարքավորումներով ապահովվածությունը, իրականացվող բժշկական ծառայությունների ծավալները, նախարարության նախաձեռնությամբ 2015թ. մեկնարակած ծրագրերի ընթացքը, այնպես էլ` կատարված ուսումնասիրությունների արդյունքները։

«Մեր նպատակն է, որ ամբողջական պատկերացում ունենանք մարզերում առողջապահական խնդիրների մասին և դրանց լուծման օպտիմալ ճանապարհներ գտնենք»,-նշեց Արմեն Մուրադյանը` առանձնակի կարևորելով բժշկական օգնության որակի, այդ թվում` ներհիվանդանոցային վարակների դեմ պայքարը և սանիտարահամաճարակային նորմերի ապահովումը, ինչպես նաև եղած միջոցների արդյունավետ օգտագործումը։

Այնուհետև ոլորտ առ ոլորտ քննարկվեցին առկա հնարավորությունները, ցուցանիշներն ու խնդիրները։ Մանրամասն վերլուծվեցին վիրաբուժական, դիալիզի, մանկական, մայրական, ծննդօգնության, դատաբժշկական և այլ ծառայությունների տեղաբաշխվածությունը, կադրերով ու սարքավորումներով ապահովվածությունը և խնդիրները։

ՀՀ ԱՆ գլխավոր և առաջատար մասնագետներին հանձնարարվեց տեղում մանրամասն ուսումնասիրել բժշկական առանձին ծառայությունների իրականացումը և հանդես գալ դրանց բարելավման առաջարկություններով։

Արմեն Մուրադյանը մարզի առողջապահական ոլորտի պատասխանատուներին և բժշկական կենտրոնների ղեկավարներին հորդորեց ծավալել բժշկական այնպիսի ծառայություններ, որոնց անհրաժեշտությունն ու հնարավորություններն ակնհայտ են։ Դա մի կողմից կլրացնի առկա բացը, մյուս կողմից` հնարավորություն կստեղծի հոգալ հիվանդանոցների պահպանման հոգսերը։ Նախարարն առաջարկեց ըստ առանձին ծառայությունների նման քննարկումներ կազմակերպել նաև մարզում` փորձելով գտնել եղած հնարավորություններն ու միջոցներն առավել արդյունավետ օգտագործելու լուծումներ։

Որոշվեց նախարարությունում հաջորդ քննարկումը կազմակերպել հանձնարարված ուսումնասիրություններն իրականացնելուց հետո։

Հարցեր, պատասխաններ, մեկնաբանություններ