ՀՀ ԱՆ. Հետազոտություններն առավել արդյունավետ կլինեին, եթե կազմակերպվեին ընդունված մեթոդաբանությամբ

ՀՀ առողջապահության նախարար Արմեն Մուրադյանի մոտ քննարկվեց  «Ալավերդի համայնքի 2015 թվականի բնական միջավայրի պահպանման և բնակչության առողջության վերականգնման» ծրագրով կանանց շրջանում իրականացված բժշկական հետազոտությունների կազմակերպման հարցը։ Քննարկմանը մասնակցում էին Լոռու մարզպետարանի առողջապահության վարչության պետը, Ալավերդու բժշկական կենտրոնի տնօրենը, ամբուլատոր-պոլիկլինիկական ծառայության գծով փոխտնօրենը, ուռուցքաբանը, գինեկոլոգը, սոնոգրաֆիստը։

Նախարարին ներկայացվեց, որ հետազոտությունները կատարվել են ըստ դիմելիության` գանգատներ ունեցող 35-60 տարեկան 550 կանանց շրջանում։

Որպես կանոն նման հետազոտություններն իրականացվում են այն քաղաքներում, որտեղ բնակչության համար առկա են առողջապահական ռիսկեր։ Ալավերդու ավագանու կողմից ներկայացված  ծրագրով այս դեպքում առաջին անգամ փորձ է արվել բնակչության թիրախային խմբում կատարել նաև հիվանդությունների վաղ հայտնաբերում։ Արդյունքում հետազոտվել է 550 կին, որից միայն 24-ն է «Հայ-ամերիկյան առողջության կենտրոնում» մամոգրաֆիական հետազոտություն անցել։ Նրանցից 8-ի մոտ հայտնաբերվել է չարորակ նորագոյացություն։

Նախարարության մասնագետները կարծիք հայտնեցին, որ այս հետազոտություններն առավել  արդյունավետ կլինեին, եթե կազմակերպվեին քաղաքացիների ընտրանքի և նրանց շրջանում հետազոտությունների իրականացման ընդունված մեթոդաբանությամբ։  

«Նման ծրագրերը, բաց դռների օրերը և տարբեր ակցիաները պետք է կազմակերպվեն հաստատված մեթոդաբանությամբ, ունենան արդյունքների հավաքագրման և հաշվետվության միջազգային չափորոշիչներին համապատասխանող ձևեր»,-ասաց նախարարը։

Հաշվի առնելով, որ ծրագիրը շարունակվելու է նաև 2016 թվականին, նախարարի հանձնարարությամբ Ալավերդու ԲԿ-ին մեթոդական աջակցություն կտրամադրվի։  

Միաժամանակ նշվեց, որ 2015թ. ծրագրով հետազոտված կանայք, ում մոտ հիվանդություններ են ախտորոշվել, համապատասխան բուժում են ստանում:

Հարկ է նշել, որ  այս ծրագրի շրջանակում իրականացված հետազոտությունների արդյունքների վերաբերյալ մամուլում  թյուրիմացաբար հրապարակվել են իրականությանը չհամապատասխանող տվյալներ։ Ոչ թե հետազոտված 550 կնոջից միայն 7-ն է առողջ, այլև 550-ից 8-ի մոտ է հայտնաբերվել քաղցկեղ։ Ի դեպ, նրանցից 7-ն արդեն վիրահատվել է։

Քննարկվեցին նաև մարզում բժշկական ծառայությունների որակի և անվտանգության ապահովման, կադրերով համալրման ու նրանց վերապատրաստման և այլ հարցեր։ Մարզի առողջապահության վարչության պետին նախարարն առաջարկեց  հանդիպումներ ունենալ Երևանի Մ. Հերացու անվան պետական բժշկական համալսարանում Լոռու մարզից սովորող ուսանողների հետ, աշխատանքային և կենցաղային հրապուրիչ պայմաններ ստեղծել`  բուհն ավարտելուց հետո  մարզի բժշկական կենտրոններում նրանց ընդգրկելու համար։

Հարցեր, պատասխաններ, մեկնաբանություններ