ՀՀ ԱՆ. Ճառագայթային ախտորոշման մեթոդով իրականացվող հետազոտությունները` ուշադրության կենտրոնում

ՀՀ առողջապահության նախարարությունում առաջատար ռենտգենաբան-ռադիոլոգների մասնակցությամբ կայացած խորհրդակցության ժամանակ քննարկվեցին ճառագայթային ախտորոշման մեթոդով իրականացվող հետազոտություններին վերաբերող հարցերը:

Մասնագետները ՀՀ առողջապահության նախարար Արմեն Մուրադյանին ներկայացրեցին ոլորտում առկա խնդիրները, անդրադարձան կադրերի վերապատրաստման, հիվանդների ուղեգրման հարցերին: Կարևորվեց Ճառագայթային ախտորոշման մեթոդով իրականացվող հետազոտությունների ժամանակ թե՛ հիվանդի, թե բուժանձնակազմի անվտանգության ապահովումը:

Քննարկվեցին ոլորտում գործող ուղեգրման կարգի վերանայման և բժշկական այլ փաստաթղթերի նույնականացմանն առնչվող հարցեր:

Ամփոփելով աշխատանքային խորհրդակցությունը՝ Արմեն Մուրադյանը հանձնարարեց ձևավորել ուլտրաձայնային ախտորոշման, համակարգչային և մագնիսառեզոնանսային շերտագրման, ինչպես նաև ռադիոիզոտոպային հետազոտության ոլորտի գլխավոր մասնագետներից աշխատանքային խմբեր, որոնք համագործակելով ՀՀ առողջապահության նախարարության ստորաբաժանումների հետ, հիմնվելով միջազգային փորձի վրա կներկայացնեն առկա խնդիրների լուծման մեթոդները:

Կլինիկական չափորոշիչների վերանայման և մշակման գործում կարևորվեց ցուցումների և հակացուցումների, ինչպես նաև մանկական տարիքում ճառագայթային ախտորոշում անցնելու սահմանափակումների ուսումնասիրման անհրաժեշտությունը:

Հարցեր, պատասխաններ, մեկնաբանություններ