ՀՀ ԱՆ. Քննարկվեց սրտի անհետաձգելի վիրահատության ծրագրի ընթացքը

 ՀՀ առողջապահության նախարարությունում կայացած աշխատանքային խորհրդակցության ժամանակ նախարարի տեղակալ Վահան Պողոսյանին ներկայացվեցին Երևանի 4 («Նորք Մարաշ», «Էրեբունի», «Մալաթիա», «Հերացի» թիվ 1 համալսարանական հիվանդանոց), ինչպես նաև Գյումրիի և Գորիսի բժշկական կենտրոններում հունվարի 1-ից  մեկնարկած  սրտի անհետաձգելի վիրահատության ծրագրի իրականացման արդյունքները։  

Մանրամասն քննարկվեցին կազմակերպական և բուժական հարցերը։ Նշվեց, որ համաձայն ՀՀ առողջապահության նախարարի 2014թ. դեկտեմբերի 24-ի 3880-Ա հրամանի, բոլոր բուժհիմնարկներից ամեն օր ՀՀ ԱՆ աշխատակազմի Պետական առողջապահական գործակալություն տեղեկատվություն է հաղորդվում բժշկական համապատասխան ցուցումների առկայությամբ կյանք փրկող ոչ դեղապատ ստենտ տեղադրելու յուրաքանչյուր դեպքի վերաբերյալ։ Գործակալության աշխատակիցները տեղերում ծանոթանում են ծրագրում ընդգրկված բոլոր դեպքերի հիվանդության պատմություններին և հետազոտություննների արդյունքներին։

Քննարկման արդյունքում շեշտվեց, որ սրտի անհետաձգելի վիրահատության ծրագիրն  իրականացվում է նախարարի հրամանով հաստատված չափորոշիչներին համապատասխան։

Վահան Պողոսյանը հանձնարարեց, որ բոլոր բուժհաստատություններում պետական կարևոր այս ծրագրի իրականացման գործում մեծ ուշադրություն դարձնեն բժշկական ծառայության որակի, ինչպես նաև ներհիվանդանոցային վարակների  կանխարգելման միջոցառումների ապահվմանը։ Հանձնարարվեց նաև ութ մարզից հիվանդների Երևան տեղափուխումն ապահովել մասնագետների ուղեկցությամբ ։

Հիշեցնենք, որ Հայաստանի Հանրապետության Նախագահի նախընտրական ծրագրի դրույթներից բխող` սուր ինֆարկտների դեպքում սրտի անհետաձգելի վիրահատությունների ծրագրի ընդլայնման նպատակով Հայաստանի Հանրապետության 2015թ. պետական բյուջեով հատկացվել է 500 մլն դրամ: Ծրագրում ընդգրկվում են այն քաղաքացիները, ովքեր մինչ այս ներառված չեն եղել սրտի անվճար ինվազիվ վիրահատության իրավունք ունեցող որևէ խմբում։ Հաշվի է առնվել այն հանգամանքը, որ մեր երկրում լայն տարածում ունեցող սրտանոթային հիվանդությունները մահացության ընդհանուր կառուցվածքում 48 տոկոս են կազմում և որ ստենտավորումն ինֆարկտի դեպքում մարդու կյանքը փրկելու ամենաարդյունավետ միջոցն է։

Հարցեր, պատասխաններ, մեկնաբանություններ