ՀՀ ԱՆ. Ասուլիս` նվիրված ներհիվանդանոցային վարակների կանխարգելմանը

ՀՀ առողջապահության նախարարությունում այսօր կայացած ասուլիսի ժամանակ նախարարի տեղակալ Վահան Պողոսյանը տեղեկացրեց, որ Առողջապահության համաշխարհային կազմակերպության տվյալով աշխարհում տարեկան ավելի քան 14 մլն մարդու հիվանդանոցային բուժման ընթացքը բարդանում է ներհիվանդանոցային վարակից։ Անգամ զարգացած երկրների ամենաժամանակակից հիվանդանոցներում բուժում ստացողների առնվազն 5-12 տոկոսի մոտ զարգանում են բուժման հետ կապված վարակային բարդություններ։ Զարգացող երկրներում այդ ցուցանիշը կազմում է ավելի քան 25 տոկոս։

Բանախոսը նշեց, որ ներհիվանդանոցային վարակների կանխարգելումն առողջապահության նախարարության քաղաքականության բաղադրիչներից մեկն է։ 2012 թվականին ՀՀ կառավարությունը հաստատել է «Հայաստանի Հանրապետությունում ներհիվանդանոցային վարակների վերահսկման և կանխարգելման 2012-2016 թվականների ծրագիրը միջոցառումների ցանկը»։ Մշակվել և ներդրվել են գործընթացը կանոնակարգող բազմաթիվ նորմատիվներ ու չափորոշիչներ։ 

ՀՀ առողջապահության նախարարի 2014թ. հոկտեմբերի 31-ի «Բժշկական օգնություն և սպասարկում իրականացնող կազմակերպություններում ներհիվանդանոցային վարակների կանխարգելման միջոցառումների գնահատման, ռենտգեն կաբինետների օդի մշտադիտարկման և լաբորատոր հետազոտությունների իրականացման 2014 թվականի ծրագիրը հաստատելու մասին» թիվ 2544-Ա հրամանը ևս բխում է կառավարության կողմից հաստատված ծրագրից։ Նախարարի հրամանի համաձայն առողջապահության համակարգում ներհիվանդանոցային վարակների կանխարգելման ուղղությամբ առկա խնդիրները վեր հանելու և դրանք կանոնակարգելու նպատակով 2014թ. նոյեմբերից ՀՀ ԱՆ «Հիվանդությունների վերահսկման և կանխարգելման ազգային կենտրոնի» մասնագետները ներհիվանդանոցային վարակների կանխարգելմանն ուղղված միջոցառումների գնահատման ուսումնասիրություններ են սկսել հանրապետության բուժհիմնարկներում։ Ուսումնասիրությունները նպատակ են հետապնդում նաև վերլուծությունների հիման վրա նոր ընթացակարգեր մշակել «Հանրային առողջապահության մասին» օրենքի նախագծում։ Ուսումնասիրություններ

ի ընթացքում «Քաջարանի բժշկական կենտրոն» ՓԲԸ-ում լաբորատոր հետազոտությունների արդյունքում հայտնաբերված շեղումների մասին ՀՀ առողջապահության նախարարությունը տեղեկացրել է հիվանդանոցի հիմնադրին` Սյունիքի մարզպետարանին: Փաստի առթիվ ՀՀ ԱՆ Առողջապահական պետական տեսչությունը վարույթ է հարուցել, իսկ քննչական կոմիտեն` քրեական գործ։ 

Վահան Պողոսյանը տեղեկացրեց, որ նախարարի հանձնարարությամբ ՀՀ ԱՆ Հիվանդությունների վերահսկման և կանխարգելման ազգային կենտրոնի մասնագետները հանրապետության հիվանդանոցային ամբողջ ցանցում (անկախ սեփականության ձևից) առաջին հերթին վիրահատարաններում, գինեկոլոգիական, դիալիզի բաժանմունքներում, լաբորատորիաներում, վիրակապարաններում ու վարակազերծման կետերում մանրակրկիտ ուսումնասիրություններ են իրականացնում։ Ուշադրության կենտրոնում է նաև այդ ծառայությունները մատուցող բուժաշխատողների կանխարգելիչ բուժզննումների կազմակերպումը։ Երկու ամսվա ընթացքում ուսումնասիրություններ կկատարվեն նաև ստոմատոլոգիական և պոլիկլինիկական ծառայություններում, լաբորատորիաներում` արդյունքների մասին տեղեկացնելով հիմնադիրներին։ Նաև հայտնեց, որ ուսումնասիրությունների և ստուգման արդյունքները կտրամադրվեն իրավապահ մարմինններին։ 

«Ես եղել եմ Քաջարանում, տեղում ծանոթացել իրավիճակին։ Մարզպետարանում մարզպետի և շահագրգիռ մարմինների հետ խնդիրը քննարկվել է։ Առաջարկել եմ, որպեսզի մարզի բոլոր բուժհիմնարկներում ուսումնասիրեն ներհիվանդանոցային վարակների կանխարգելման և բժշկական ծառայության որակի ապահովման նորմատիվների կատարման գործընթացը։

Պայմանավորվածություն ենք ձեռք բերել հետազոտման, ուսումնասիրման, վարույթի արդյունքները համադրել, որպեսզի հասկանանք Քաջարանի բժշկական կենտրոնում կատարվածի պատճառները»,-ասաց փոխնախարարը։ Նա նաև նշեց, որ Քաջարանի բժշկական կենտրոնում հեպատիտ c-ով վարակված քաղաքացիներն անվճար բուժում կստանան։

Այժմ ընթանում է 2015 թվականի պետական պատվերի տեղադրման գործընթացը։ Պայմանագրերի կնքման ժամանակ կարևորվում են ներհիվանդանոցային վարակների կանխարգելման գործընթացի և բժշկական ծառայությունների որակի պատշաճ վերահսկողության ապահովումը։ 

ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը ներկայացրեց իր ղեկավարած կառույցի գործառույթներն ու ներհիվանդանոցային վարակների կանխարգելման ուղղությամբ իրականացրած աշխատանքները։

Հարցեր, պատասխաններ, մեկնաբանություններ