ՀՀ ԱՆ. Ուրվագծվեցին կյանք փրկող նոր ծրագրի կազմակերպչական հարցերը

Հայաստանի Հանրապետության 2015թ. պետական բյուջեով սրտի անհետաձգելի վիրահատությունների ծրագրի իրականացման համար կհատկացվի 500 մլն դրամ:  

ՀՀ առողջապահության նախարար Արմեն Մուրադյանի հրավիրած  աշխատանքային խորհրդակցության ընթացքում հանրապետության   ինվազիվ սրտաբանական ծառայություն  իրականացող  խոշոր բժշկական կենտրոնների ներկայացուցիչների մասնակցությամբ քննարկվեցին ծրագրի իրականացման կազմակերպական հարցեր, ինչպես նաև այլ մանրամասներ:

Արմեն Մուրադյանը նշեց, որ կյանք փրկող այս ծրագրից կօգտվեն այն քաղաքացիները, ովքեր ներառված չեն սրտի անվճար վիրահատության իրավունք ունեցող որևէ խմբում:

Կենսական կարևորության շտապ բուժօգնություն պահանջող դեպքերն որոշելու համար ՀՀ առողջապահության նախարարության գլխավոր սրտաբան Համլետ Հայրապետյանի ղեկավարությամբ   ստեղծվել է հանձնաժողով:  

Նախարարը շեշտեց, որ ծրագրի իրականացման համար կարևոր է նվազագույնի հասցնել բոլոր հնարավոր ռիսկերը, ինչպես նաև հաշվի առնել կարիքներն ու հնարավորությունները: Այդ կապակցությամբ նա հանձնարարեց վերլուծել սրտի անետաձգելի վիրահատությունների վերաբերյալ վիճակագրական տվյալները, մշակել ծրագրի իրականացման մոնիթորինգային խմբի չափորոշիչները, հստակեցնել կազամկերպական և ֆինանսական հարցերը: Կարևորվեց ծրագրի իրականացման ընթացքի մասին հանրության իրազեկումը:

Մինչ տարեվերջ նախատեցվում է իրականացնել փորձարարական ծրագիր:

Հարցեր, պատասխաններ, մեկնաբանություններ