Ստեփանակերտի նորաբաց սրտի ստենտավորման կենտրոնում կատարվել են առաջին վիրահատությունները. artsakhpress.am

Ստեփանակերտի Հանրապետական բժշկական կենտրոնի նորաբաց սրտի ստենտավորման կենտրոնում արդեն յոթ վիրահատություն է կատարվել: Այս մասին «Արցախպրես»-ի թղթակցի հետ զրույցում ասել է Երևանի «Էրեբունի» բժշկական կենտրոնի անգիոգրաֆիկ ծառայության ինվազիվ սրտաբան Արսեն Ծատուրյանը, ով առաջիկայում դեռ Արցախում կլինի և կիրականացնի մասնագիտական օգնություն:

«Երեկ արդեն իրականացրել ենք հիվանդների յոթ վիրահատություն, երկու ստենտավորում, և ամեն ինչ բարեհաջող է անցել, հիվանդների վիճակը կայուն է և կշարունակեն իրենց հետագա բուժումները իրականացնել: Տեղի մասնագետները շատ խելացի, բանիմաց են և տիրապետում են գործին»,- ասաց Ա. Ծատուրյանը՝ հավելելով, որ կենտրոնում տեղադրվել է գերմանական «Սիմենս» ընկերության վերջին սերնդի անգիոգրաֆը: Այս սարքի տեխնիկական հնարավորությունները թույլ են տալիս պարզորոշ տեսնել մարդու ցանկացած անոթ, կատարել ներանոթային միջամտություններ՝ անգիոգրաֆիա, ստենտավորում, ի դեպ, ոչ միայն սրտի անոթների, այլև նաև մնացած բոլոր օրգանների: Ըստ Ծատուրյանի, Ստեփանակերտում տեղադրված անգիոգրաֆիկ սարքավորումը տեխնիկայի վերջին նորությունն է, որից չկա ոչ միայն Հայաստանում, այլև ողջ տարածաշրջանում:

Ինչպես «Արցախպրես»-ի թղթակցի հետ զրույցում նշեց կենտրոնում առաջինը վիրահատված այցելու Արտակ Հովսեփյանը, իրեն շատ լավ է զգում, և շատ գոհ է թե՛ բժիշկներից, և թե՛ կենտրոնում իր հանդեպ ցուցաբերվող վերաբերմունքից ու ուշադրությունից:

Հարցեր, պատասխաններ, մեկնաբանություններ