ՀՀ ԱՆ. Էբոլայի միակ պատվաստանյութը փորձարկման շրջանում է. սեմինար Ստեփանակերտում

Հանրապետական բժշկական կենտրոնի դահլիճում, ԼՂՀ առողջապահության նախարարության հրավերով Արցախ ժամանած Հայաստանի Հանրապետության առողջապահության համապատասխան մասնագետները մեթոդագործնական հանդիպում են անցկացրել հանրապետության տարբեր բժշկական հաստատություններից ժամանած բուժանձնակազմի հետ։

«Սեզոնային գրիպ», «Գրիպի H7 N9 ենթատեսակ», «Կորոնավիրոսներ», «Էբոլա» հիվանդությունների վերաբերյալ զեկուցմամբ հանդես են եկել Հայաստանի Հանրապետության առողջապահության նախարարության ՀՎԿԱԿ (հիվանդությունների վերահսկման և կանխարգելման ազգային կենտրոն) օդակաթիլային վարակների և հատուկ վտանգավոր վարակիչ հիվանդությունների համաճարակաբանության բաժնի պետ Լիանա Թորոսյանը։ Նա, մասնավորապես անդրադարձել է գրիպի առավել վտանգավոր ու տարածված ենթատեսակներին՝ թռչնագրիպ, խոզագրիպ և այլն, նշելով այն անհրաժեշտ միջոցառումները, որոնք պետք է իրականացնել դրանց կանխարգելման և բուժման համար։ Ոլորտի պատասխանատուն մանրամասնորեն ներկայացրել է նաև դարի մարտահրավեր հանդիսացող Էբոլա վիրուսի նախապատմության, դրա տարածման մասշտաբների, վարակի աղբյուրների, ինչպես նաև կանխարգելման և բուժման վերաբերյալ տեղեկություններ։

Զեկուցման համաձայն, վարակի հիմնական աղբյուրը հանդիսանում են չղջիկների ու կապիկների որոշ տեսակներ, որոնք Հայաստանում և Արցախում չկան։ Հայկական երկու հանրապետություններ Էբոլայի ներթափանցումը հնարավոր է միայն մարդու միջոցով։ Մասնագետն ընդգծել է, որ Էբոլան օդակաթիլային եղանակով չի տարածվում, իսկ հիմնական վտանգը հանդիսանում է վարակակրի հետ փոխշփումը։ Լ. Թորոսյանի խոսքով, թեև ամեն ինչ արվում է սննդի միջոցով Էբոլայի ներթափանցման կանխարգելման առումով, այնուամենայնիվ ջերմային համապատասխան մշակման դեպքում վիրուսը ոչնչանում է:

 ՀՀ-ում և Արցախում ձևավորված են Էբոլայի դեմ պայքարի անհրաժեշտ բոլոր միջոցները՝ կադրային ռեսուրսներ, լաբորատորիա, արագ արձագանքման խմբեր, անհատական պաշտպանիչ արտահագուստներ, ախտահանիչ նյութեր և այլն։ Այսօր արդեն տրամադրվել է մեթոդագործնական օգնություն՝ Էբոլայի առանձնահատկությունների, կանխարգելման, բուժման, մեկուսացման մասին:

Ներկայումս Էբոլայի դեմ կանադացի մասնագետների ստեղծած միակ պատվաստանյութը դեռևս փորձարկման շրջանում է Առողջապահության համաշխարհային կազմակերպության կողմից:

Հարցեր, պատասխաններ, մեկնաբանություններ