Ս. Ավդալբեկյանի անվան Առողջապահության ազգային ինստիտուտում անցկացվեց «Իսկ դու ունե՞ս աղջիկ» խորագրով միջոցառում

ՀՀ առողջապահության նախարարության և ՄԱԿ-ի հիմնադրամի նախաձեռնությամբ ՀՀ ԱՆ ակադեմիկոս Ս. Ավդալբեկյանի անվան առողջապահության ազգային ինստիտուտում այսօր՝ հոկտեմբերի 24-ին, անցկացվեց «Իսկ դու ունե՞ս աղջիկ» խորագրով միջոցառում:

Համանուն ֆլեշմոբին մասնակցած հայրեր-դուստրեր լուսանկարների ցուցահանդեսի և տեսաֆիլմի միջոցով հանրության ուշադրությունը ևս մեկ անգամ հրավիրվեց հղիության սեռով պայմանավորված արհեստական ընդհատման խնդրին: Բացման խոսքով հանդես եկան ՀՀ ԱՆ փոխնախարար Սերգեյ Խաչատրյանը և ՄԱԿ- ի Բնակչության հիմնադրամի գործադիր ներկայացուցիչ Գարիկ Հայրապետյանը: Միջոցառմանը ներկա էին նաև «Իսկ դու ունե՞ս աղջիկ» ֆեյսբուքյան ֆլեշմոբի նախաձեռնողներն ու մասնակիցները:

Այս նախաձեռնությունը միտված էր հանրային կարծիքի և վարքագծի փոփոխությանը: Ֆլեշմոբի նախաձեռնողներից Արամազդ Ղալամաքարյանի և իր համախոհների կարծիքով օրենսդրական փոփոխություններին համընթաց պետք է քայլեր ձեռնարկվեն մեր երկրում հասարակության գիտակցությունը խնդրի շուրջ բարձրացնելու ուղղությամբ:

Հղիության սեռով պայմանավորված արհեստական ընդհատումների կանխարգելման նպատակով ՀՀ ԱՆ և միջազգային փորձագետներն ուսումնասիրում են այլ երկրներում կիրառվող մեթոդներն ու դրանց արդյունավետությունը: Բանակցություններ են վարում Առողջապահության համաշխարհային կազմակերպության փորձագետների հետ: Ինչպես տեղեկացրեցին ԱՆ ներկայացուցիչները, արդյունքում կմշակվի «Մարդու վերարտադրողական առողջության և իրավունքների մասին» օրենքում լրացումներ և փոփոխություններ կատարելու մասին նախագծի նոր փաթեթ, որը ենթադրում է օրենսդրորեն ամրագրել սեռով պայմանավորված՝ հղիության արհեստական ընդհատման արգելքը, ինչը ներկայում օրենսդրության մեջ արտացոլված չէ:

Առողջապահության նախարարությունը նպատակ ունի հղիության արհեստական ընդհատումների կրճատմանն ուղղված օրենսդրական լրացուցիչ այնպիսի կարգավորումներ և մեխանիզմներ մշակել, որոնք մոր առողջության համար ռիսկեր չեն ավելացնի: Առաջնային կլինի նորածնի սեռի նախապատվության առումով կնոջ, ընտանիքի, հասարակության վարքագծի վրա ազդող մեխանիզմների մշակումը:

Նախատեսվում է նաև հղիության արհեստական ընդհատման հետևանքների մասին բուժաշխատողների կողմից կնոջը հանգամանալից տեղեկացնելու, հղիության ընդհատման որոշումը վերանայելու համար որոշակի ժամանակ տրամադրելու պարտադիր պահանջների սահմանում: Տարբերակներից մյուսն է՝ հղիության արհեստական ընդհատումից առաջ սոնոգրաֆիկ հետազոտությամբ մորը, հարազատներին պտղի ներարգանդային կյանքը՝ շարժումները, դեմքը, սրտի բաբախը ցույց տալը,: Հաշվի կառնվեն նաև բժշկական ցուցումներով պայմանավորված բացառությունները՝ սեռի հետ փոխկապակցված ժառանգական հիվանդություններ, բնածին արատներ և այլն, ինչից ելնելով կսահմանվեն արհեստական ընդհատման առավել հստակ բժշկական ցուցումներ: 

Այս տարվա օգոստոս ամսից «Իսկ դու ունե՞ս աղջիկ»  խորագրով մեկնարկած ֆեյսբուքյան ֆլեշմոբը սոցիալական կարևոր նախաձեռնություն էր, որը մեծ հանրային արձագանք ստացավ՝ առաջին իսկ շաբաթվա ընթացքում ներգրավելով ավելի քան հարյուր հազար մարդ:

Հարցեր, պատասխաններ, մեկնաբանություններ