ՀՀ առողջապահության նախարար Արմեն Մուրադյանը ամփոփեց պաշտոնավարման 100 օրվա ընթացքում կատարված աշխատանքները

ՀՀ ԱՆ շարունակում է համակարգում իրականացվող ծրագրերն  ու բարեփոխումները: Միաժամանակ, առաջնորդվելով Հայաստանի նոր կառավարության ծրագրով, ինչպես նաև հանրապետության Նախագահի կողմից տրված հանձնարարականներով` կյանքի են կոչվում նոր ծրագրեր: Այս մասին լրագրողների հետ հանդիպման ժամանակ հայտարարեց ԱՆ նախարար Արմեն Մուրադյանը:

Ա. Մուրադյանն ասաց, որ վերջին երկու ամսում ԱՆ նախարարությունում ակտիվ քննարկումներ են կազմակերպվել «Դեղերի մասին» ՀՀ օրենքի նախագիծը լրամշակելու ուղղությամբ: Այն ամբողջությամբ կարգավորելու է դեղերի շրջանառությունը, բնակչությանը որակյալ և անվտանգ դեղերով ապահովումը, դեղերի ֆիզիկական և տնտեսական մատչելիությունը, դեղերի տեղական արտադրության խթանումը և այլն: Ուշադրության կենտրոնում են հատկապես դեղերի գների պետական կարգավորմանը, զուգահեռ ներկրմանը, գրանցման ընթացակարգերին ու կլինիկական հետազոտություններին վերաբերող դրույթները:

ԱՆ նախարարի փոխանցմամբ` առողջապահության նախարարությունը որդեգրել է նոր պատվաստանյութերի ներդրման քաղաքականություն, որը միտված է նպաստելու նոր հիվանդությունների վերահսկման գործընթացին: Սեպտեմբերին Պատվաստումների ազգային օրացույցում ներդրվելու է պնևմակոկային պատվաստանյութը` նպատակուղղված պնևմոկոկային պատճառականության հիվանդությունների վերահսկմանը և դրանցից մահացության ցուցանիշի նվազեցմանը:

Ա. Մուրադյանը տեղեկացրեց, որ շարունակվում է մարզային բժշկական հաստատությունների արդիականացման ծրագիրը: Ըստ ԱՆ նախարարի` մայիսին շահագործվեց հիմնանորոգված և նորագույն սարքավորումներով հագեցած Ալավերդու բժշկական կենտրոնը, որը բուժծառայություններ է մատուցում նաև հարևան մի շարք համայնքներին: Շարունակվում են Ճամբարակի, Կապանի, Բերդի, Մեղրիի, Վանաձորի հիվանդանոցների շինաշխատանքները, գյուղական մի շարք բնակավայրերում ամբուլատորիաների կառուցման կամ հիմնանորոգման աշխատանքները: Ավարտվել է Գյումրու ախտաանա-անատոմիական լաբորատորիայի նոր շենքի կառուցումը: Ա. Մուրադյանի խոսքով` Հանրապետության նախագահի անմիջական հսկողության ներքո են Ուռուցքաբանական գերազանցության հայկական կենտրոնի և պրոֆեսոր Ռ. Յոլյանի անվան արյունաբանական կենտրոնի նոր երկհարկանի մասնաշենքի կառուցման աշխատանքները:

Նախարարը նաև խոսեց սրտի անհետաձգելի վիրահատության արդի ծառայությունների մասին: Ըստ Ա. Մուրադյանի` ծառայություններն ընդլայնվել են. ներկայումս սրտի անվճար և արտոնյալ վիրահատություններ տրամադրվում են միայն բնակչության սոցիալապես անապահով և հատուկ խմբերում ընդգրկված 36,0 և ավելի անապահովության միավոր ունեցող անձանց, անվճար բուժիրավունք ունեցող սոցփաթեթի շահառուներ հանդիսացող զինծառայողներին և նրանց ընտանիքի անդամներին, պետական հիմնարկների աշխատողներին:

Ա. Մուրադյանն ասաց նաև, որ մոր և մանկան առողջապահության պահպանումը կարևորագույն խնդիր է: Իր իսկ խոսքով` առողջապահության գերատեսչությունը հետամուտ է, որպեսզի թե՛ ծննդօգնության, թե՛ մինչև յոթ տարեկան երեխաների որակյալ բժշկական օգնությունը կատարվի պետպատվերի շրջանակում, և նվազագույնի հասցվեն կոռուպցիոն ռիսկերը:

Հարցեր, պատասխաններ, մեկնաբանություններ