Արևայրուքի հետևանքով մարդու մաշկը կորցնում է խոնավությունն ու դիմադրողականությունը. մաշկավեներաբան

Տարածված այն կարծիքը, թե արևայրուքն առողջարար է մարդու օրգանիզմի համար, սխալ է: Այդ մասին լրագրողների հետ հանդիպման ժամանակ հայտարարեց  թիվ 2 բուժմիավորման մաշկավեներաբան Սամվել Խաչատրյանը:

«Մարդիկ լողափ են գնում, որպեսզի հատուկ արևայրուք ստանան, ապա գալիս ու գլուխ են գովում, թե ինչ մուգ մաշկ ունեն: Բժշկական տեսակետից՝ չի խրախուսվում: Արևայրուքի հետևանքով մարդու մաշկը կորցնում է խոնավությունն ու դիմադրողականությունը: Իսկ այդ ֆոնին կարող են ի հայտ գալ որոշակի մաշկային հիվանդություններ»,- ասաց Սամվել Խաչատրյանը:

Վ.Ա. Ֆանարջյանի անվան ազգային ուռուցքաբանական կենտրոնի բժիշկ-ուռուցքաբան Հրայր Հակոբյանի խոսքով` մաշկի քաղցկեղների հիմնական ռիսկի գործոն համարվում են ուլտրամանուշակագույն ճառագայթները. «Բոլորիս հայտնի է, որ մարդկանց մոտ կան բազմաթիվ պիգմենտային գոյացություններ, որոնք ուլտրամանուշակագույն ճառագայթների ազդեցության տակ կարող են վերափոխվել և դառնալ չարորակ ուռուցքներ, մելանոմաներ… »:

Հ. Հակոբյանը նաև հավելեց, որ արևի ճառագայթներից պետք է հատկապես խուսափեն մարդիկ, ովքեր ունեն բաց գույնի մաշկ, աչքեր և մազեր:  Ըստ ուռուցքաբանի` ռիսկային խմբում են գտնվում բաց տարածություններում աշխատող մարդիկ. ձկնորսները, նավաստիները:
«Չարորակ ուռուցքների բուժումից հետո հիվանդներին խորհուրդ ենք տալիս խուսափել արևայրուքից, արևային լոգանքներից:  Դա չի նշանակում, որ նման հիվանդություններ ունեցող մարդիկ պետք է չմեկնեն հանգստյան գոտի, ծով: Պարզապես պետք է իրենց հեռու պահեն արևի ճառագայթներից»,- հստակեցրեց Հ. Հակոբյանը:

Ասուլիսին ներկա երկու բժիշկները հորդորեցին արևապաշտպան միջոցներ օգտագործել`բարդություններից խուսափելու նպատակով:  «Արևից պաշտպանող քսուքները հիմնականում բաժանվում են երկու խմբի`իրենց ազդեցության տեսակով: Առաջին տեսակը արտացոլում է արևային ճառագայթները, երկրորդը` թուլացնում է արևային ճառագայթների ազդեցությունը մաշկի վրա և պաշտպանիչ որոշակի շերտ ստեղծում: Վաճառքում գտնվող գրեթե բոլոր արևապաշտպան միջոցները լավն են»,- ասաց մաշկավեներաբանը:

Ի դեպ, արևապաշտպան միջոց ընտրելիս, Ս. Խաչատրյանը խորհուրդ տվեց օգտվել բրենդային միջոցներից, որոնք, ըստ նրա` ստուգված և փորձված են տարիներով:

Ժողովրդական միջոցներից մաշկավեներաբանը հորդորեց հրաժարվել. «Շատերը մածուն են քսում այրվածք ստացած մաշկին, ինչն անթույլատրելի է: Մածունը աբսորբենտ է: Այն քաշում և կլանում է մաշկից հեղուկը: Զովացնելուց հետո մաշկի վիճակն ավելի վատանում է: Կարող եք չիչխանի յուղ քսել: Այն ունի բուժիչ հատկություններ»:

Հարկ է նաև արևայրուքի դեպքում մաշկը խոնավացնող, փափկացնող միջոցներ օգտագործել. կարելի է սովորական մանկական քսուքներ, որոնք պարունակում են A և E վիտամիններ:

Հարցեր, պատասխաններ, մեկնաբանություններ