Հայաստանում կլինիկական ծառայությունների որակի եւ մասնագիտական վարպետության մեծ բեւեռացում կա. med.news.am

Հայաստանում կլինիկական ծառայությունների որակի եւ մասնագիտական վարպետության մեծ բեւեռացում կա, կարծում է Քլիվլենդի կլինիկայի մանկաբուժական անեսթեզիոլոգիայի բաժանմունքի վարիչ Սթիվեն Քիմաթյանը (Stephen Kimatian):

NEWS.am Medicine-ի թղթակցի հետ զրույցում նա նշել է, որ խնդիրն, իր համոզմամբ, Հայաստանի առողջապահության համակարգի մարտահրավերներից մեկն է. բոլոր կլինիկաները տարբեր կերպ են «զինված»՝ տարբեր սարքավորումներ են օգտագործում, տարբեր ուղեցույցերով առաջնորդվում եւ նույն խնդրի հանդեպ տարբեր մոտեցումներ ցուցաբերում: Սա, մասնագետի կարծիքով, իրոք խնդիր է, քանի որ այս կամ այն հիվանդության դեպքում չես կարող ակնկալել, թե անկախ կլինիկայից՝ կարող ես նույնատիպ բուժումը ստանալ:

Սթիվեն Քիմաթյանի խոսքով, Հայաստանում մասնագետների վարպետության մակարդակը նույնպես տարբեր է: Օրինակ, երկու տարբեր կլինիկաներում աշխատող անեսթեզիոլոգները կարող են բոլորովին տարբեր գիտելիքներ եւ հմտություններ ունենալ՝ կախված այն հանգամանքից, թե ինչ ոլորտում է մասնագիտացված տվյալ կլինիկան: Նույնիսկ միաժամանակ համալսարանն ավարտած երկու մասնագետներ կարող են բոլորովին տարբեր բաներ անել:

Արեւմուտքում, Սթիվեն Քիմաթյանի խոսքով, ամեն ինչ մի փոքր այլ է. եթե բժիշկը համալսարան է ավարտել եւ ինչ-որ մասնագիտություն ձեռք բերել, կարելի է ակնկալել, որ նա հստակ գիտելիքներ, կարողություններ եւ հիվանդների հետ աշխատելու փորձ ունի:

Քլիվլենդի կլինիկայի մասնագետը կարծում է, որ եթե Հայաստանում էլ սկսեն նույն մոտեցումները՝ բոլոր կլինիկաների եւ մասնագետների համար միեւնույն ստանդարտները կիրառել, առողջապահական համակարգը միանշանակ կշահի դրանից:

Հարցեր, պատասխաններ, մեկնաբանություններ