Հայ և ռուս մասնագետները կհամագործակցեն իմունականխարգելման ոլորտում

Մոսկվա կատարած աշխատանքային այցի շրջանակում ՀՀ առողջապահության նախարար Արմեն Մուրադյանը երեկ` հունիսի 2-ին, այցելել է Մոսկվայի պետական համալսարանի բժշկական կենտրոն, որը  հագեցած է բուժական, վիրահատական և ուսումնական ամենավերջին սերնդի սարքավորումներով ու պարագաներով։

Ինչպես «Արցախպրես»-ին տեղեկացրին ՀՀ առողջապահության նախարարությունից, կլինիկայի ղեկավար Արամայիս Կամալովն Արմեն Մուրադյանին է ներկայացրել նաև ուսումնական բաժնի, բուժական ֆակուլտետի գործունեությունը: Տպավորիչ է եղել հատկապես ուսումնական վիրահատություններ կատարող ռոբոտ «Դա Վինչին», որ դեռևս հազվադեպ է կիրառվում նույնիսկ Եվրոպայում: Կողմերը բանակցել են երկկողմ համագործակցության հնարավորությունների շուրջ։ Նախնական պայմանավորվածություն է ձեռք բերվել կրթության և վերապատրաստման նպատակով հայ մասնագետների, ուսանողների այցելությունների շուրջ:  

Նույն օրը ՀՀ առողջապահության նախարարը հանդիպել է Ռուսաստանի Դաշնության սպառողների իրավունքների պաշտպանության ոլորտում հսկողություն իրականացնող դաշնային ծառայության (Ռոսպոտրեբնադզոր) ղեկավար Աննա Պոպովայի հետ: ՌԴ կառավարության առընթեր գործող այդ մարմնի գործառույթներին նախարարը ծանոթացել է տեղում: Պայմանավորվածություն է ձեռք բեվել ընդլայնել համագործակցությունը փորձի փոխանակման և իմունականխարգելման ոլորտում:

Հարցեր, պատասխաններ, մեկնաբանություններ