Արցախի բուժքույրերի համար մեթոդական դասընթացներ են կազմակերպվել

ԼՂՀ առողջապահության նախարարության նախաձեռնությամբ այսօր Ստեփանակերտի` Թամարա Քամալյանի անվան բժշկական քոլեջում տեղի են ունեցել մեթոդական դասընթացներ, որոնք անցկացվել են Երևանի հայ-ամերիկյան «Էրեբունի» պետական բժշկական քոլեջի մասնագետների կողմից:

Ինչպես «Արցախպրես»-ի թղթակցի հետ զրույցում ասաց Երևանի հայ-ամերիկյան «Էրեբունի»  պետական բժշկական քոլեջի տնօրեն Ալինա Քուշկյանը, դասընթացների նպատակն է  արդի բուժքույրական աշխատանքներում զարգացնել գործնական հմտությունները` հատկապես վնասվածքաբանության, նախահոսպիտալացման և  սիրտ-թոքային վերակենդանացման  ուղղություններով:

Ա. Քուշկյանի տեղեկացմամբ, դասընթացներին մասնակցում են թվով 600 բուժքույրեր` Արցախից և ՀՀ-ից, ովքեր բաժանված են առանձին սեկցիաների:

«Համոզված ենք, որ այս դասընթացներն օգտակար կլինեն տեղի բուժքույրերի համար, և գործնական աշխատանքում դրական առումով կազդեն սպասարկման որակի վրա»,- ասաց Ալինա Քուշկյանը` հավելելով, որ դասավանդող բոլոր մասնագետներն ունեն հավաստագրեր` համապատասխան դասընթացներ անցկացնելու համար:

Ա. Քուշկյանը տեղեկացրեց նաև, որ ծրագրի շրջանակում Երևանի հայ-ամերիկյան «Էրեբունի» պետական բժշկական քոլեջը Ստեփանակերտի Թամարա Քամալյանի անվան բժշկական քոլեջին նվիրաբերել է տարբեր դասագրքեր:  

Հարցեր, պատասխաններ, մեկնաբանություններ