Շտապ օգնության կանչերը կտրուկ ավելացել են. օրական 600 կանչ

Այս մասին լրագրողների հետ հանդիպմանն ասաց «Շտապօգնություն» ՓԲԸ-ի տնօրեն Թագուհի Ստեփանյանը: Վերջինս այս հանգամանքը կապում է «Շտապ օգնության» ծառայության  նկատմամբ ազգաբնակչության վստահության ավելացմամբ:

Չնայած այս փաստին` առողջապահության նախարարության արտահիվանդանոցային բժշկական օգնության քաղաքականության բաժնի պետ Ռուզաննա Յուզբաշյանը դժգոհ է մարդկանց վերաբերմունքից: «Շտապօգնության բժիշկներին ծեծելը, վիրավորելը, շտապօգնության մեքենաների ընթացքը փողոցում խոչընդոտելը տարածված երևույթ է դարձել»,-ասում է Ռուզաննա Յուզբաշյանը:

Հակառակ դժգոհությունների` «Շտապ օգնություն» ծառայությունը մի շարք կարևոր ծրագրեր է իրականացնել վերջին տարիներին, որոնք նպաստել են ծառայության որակի բարձրացմանը: «Շտապ օգնության» մասնագետները կրթվել են նոր ծրագրային համակարգով, «Շտապ օգնության» 35 մեքենաներ են ձեռք բերվել, մշակվել են ոլորտը կարգավորող նոմարտիվներ, սանիտարական բոլոր ավտոմեքենաները կահավորվել են օդի վարակազերծման սարքավորումներով, բարելավվել են աշխատողների աշխատանքային պայմաննները:

 «Երևանում օրական  սպասարկվում է միջինում 600 կանչ: Դրանցից շուրջ 120-ը հոսպիտալիզացվում են: Կանչերի բարձր քանակն այսօր խնդիր է մեր ծառայության համար» ,-ասում է Թագուհի Ստեփանյանը: Վերջինս չհերքեց ոլորտում այլ խնդիրների առկայությունը, սական ընկերության համար գերխնդիր է մնում կանչերի մեծ թիվը: Ներկայումս Երևանում գործում է յուրաքանչյուր 30 հազար բնակչին 1 բրիգադ, իսկ մարզի համար` 20 հազար բնակչին 1բրիգադ: Բանախոսները ներկայացրին նաև ծառայության հետագա զարգացման ռազմավարությունը,  ըստ որի` պետք է ավելացնեն  բրիգադների քանակը, կանչերին ավելի արագ արձագանքելու նպատակով ենթակայաններին կից շտապ օգնության հենակետեր ավելացվեն այն սկզբունքով, որ քաղաքի ցանկացած մասում հենակետից մինչև կանչ տվողի հասցեն եղած հեռավորությունը չգերազանցի 4 կմ-ը: Ի դեպ, ներկայումս այդ հեռավորությունը չպետք է գերազանցի 8 կմ-ը: «Պետք է աշխատանքներ տանել նաև քաղաքացիներին շտապ օգնության ծառայությանը դիմելու կանոնների և դիմելու անհրաժեշտության իրազեկման ուղղությամբ»,- ասում է Ռուզաննա Յուզբաշյանը:

Հարցեր, պատասխաններ, մեկնաբանություններ