Հաշմանդամները չպետք է իրենց շրջապատից օտարված զգան. Հասարակական կազմակերպություն

Այսօր Հայաստանում հաշմանդամներն իրենց ավելի լավ են զգում, քան տարիներ առաջ, քանի որ այս մարդկանց համար ավելի լայն հնարավորություններ են ստեղծվում տարբեր բնագավառներում իրենց դրսեւորելու համար,- գրում է   news.am-ը:

Այս մասին դեկտեմբերի 3-ին, Երեւանում տեղի ունեցած  հաշմանդամների պաշտպանության Միջազգային օրվան նվիրված մամլո ասուլիսի ժամանակ հայտարարեց  «Հայաստանի հաշմանդամների «Փյունիք» միություն» հասարակական կազմակերպության ներկայացուցիչ Հակոբ Աբրահամյանը:

Աբրահամյանը նշեց, որ մասնավոր անձիք ավելի մեծ հաճույքով են ուշադրություն դարձնում որակյալ թեքահարթակների տեղադրմանը, եւ այս գործընթացում հասարակական կազմակերպություններն ակտիվ դեր են խաղում , ինչպես նաեւ դիտվում է օգնություն պետության կողմից:  Նրա խոսքով, քաղաքը պետք է հնարավորինս հարմարավետ լինի հաշմանդամների տեղաշարժման համար:

Հակոբ Աբրահամյանը հաղորդեց, որ պետության ղեկավար Սերժ Սարգսյանի հրահանգով Արտակարգ իրավիճակների նախարարության արագ արձագանքման խմբում աշխատատեղեր են ստեղծվել հաշմանդամների համար, եւ հիմա նրանք իրենց երջանիկ են զգում:

Սահմանափակ հնարավորություններով մարդկանց խնդիրներով զբաղվող հասարակական կազմակերպության ղեկավարի կարծիքով, նրանց համար պետք է այնպիսի պայմաններ ստեղծվեն, որպեսզի նրանք չօտարվեն շրջապատից, այլ ձուլվեն նրա հետ: Այս խավի մարդկանց համար կարեւոր խնդիր է հանդիսանում հասարակական տրանսպորտից օգտվելու հարցը: Ա. Աբրահամյանի խոսով, շուտով Չինաստանից Հայաստան կներմուծվեն  հատուկ սարքավորված ավտոբուսներ, որից հետո մասնագետները կդիտարկեն հարցը. ավելի էժան է դրանք ներմուծել , թե՞ այստեղ արտադրել: Նա տեղեկացրեց, որ  2014 թվականին նախատեսվում է   30 միլիոն դրամ տրամադրել  հաշմանդամների համար լիֆտերի եւ ավտոբուսների վերասարքավորման ու թեքահարթակների կառուցման  համար:

Իրավաբանների միջազգային ասոցացիայի նախագահ եւ հոգեբան Խաչատուր Մարոզյանը նշեց, որ Հայաստանում բացակայում են այս ոլորտը կարգավորող մեխանիզմներն ու ենթաօրենսդրական ակտերը: « ՀՀ հաշմանդամների սոցիալական պաշտպանության մասին»  օրենքը  կոչված է պաշտպանելու հաշմանդամների իրավունքները, մինչդեռ գործնականում դա այդպես չէ: Դրանով հիմնականում զբաղվում են մասնավոր կազմակերպությունները»,- նշեց Մարոզյանն, ավելացնելով, որ պետությանըը մշտապես պետք է հիշեցնել, որպեսզի օրենքը իրագործվի: «Հաշմանդամներն ամսական ստանում են մոտավորապես 15000 դրամ, մասնավոր անձանց կողմից շարժասայլակներ, բայց այս ամենից նրանք իրենց պաշտպանված չեն զգում»,- նշեց Մարոզյանը:

Հարցեր, պատասխաններ, մեկնաբանություններ