Ծննդաբերության մասին նոր օրենքը մի շարք խնդիրներ կառաջացնի. սոցիոլոգ

Lրագրողների հետ հանդիպման ընթացքում սոցիոլոգ Ահարոն Ադիբեկյանն անդրադառնալով առողջապահության ոլորտում «Ծննդաբերության մասին օրենքում փոփոխություններ և լրացումներ կատարելու մասին» նոր որոշմանը` նշեց, որ սույն որոշմամբ առաջ կգան մի շարք խնդիրներ:

Հիշեցնենք, որ նոր օրենքով` յուրաքանչյուր հղի կին պետք է ծննդաբերի իր տարածքի բուժհաստատությունում` անվճար սկզբունքով:

«Սոցիալական և իրավական հարցեր են առաջ գալիս: Եվ վերջին հաշվով` դա կապված է մոր և մանկան առողջության հետ: Նորմալ ծննդաբերությունը կախված է հիմնականում հղի կնոջ առողջությունից և հարց է, թե որքանո՞վ կարող են մարզերում հղի կնոջ համար որակյալ սպասարկում ապահովել»,- հավելեց նա նշելով, որ այսօր մարզային բուժհաստատությունների մեծամասնությունը ոչ բարվոք վիճակում է գտնվում:  «Այս որոշմամբ փորձում են ոլորտը մասնավորեցնել ու բիզնես դարձնել: Այս քայլը հանգեցրել է նրան, որ առաջանան մասնավոր ծննդատներ»,- նկատեց սոցիոլոգը հավելելով, որ մասնավոր հիվանդանոցների հիմնումն իրականում նորմալ երևույթ է, սակայն եթե փորձում են սահմանափակումներ մտցնել մարզերի բնակիչների համար`դա շատ բացասական է:

Նրա խոսքով` նախորդ տարիների համեմատ  ծննդաբերության ընթացքում մահացության դեպքերը նվազել են: Նվազել են նաև, այսպես ասած, տանը ծննդաբերելու ընդունված սովորույթը. «Ոչ բոլոր կանաք են առողջապես պատրաստ մայր դառնալուն: ինչ վերաբերում է տանը ծննդաբերելուն`ապա 2000 թվականին տանը ծնել է մոտ 1000 կին, իսկ 2005 թվականին այդ թիվը նվազել է` հասնելով 600-ի: Դրական տենդենցը վկայում  է այն մասին, որ վստահությունը բուժհաստատությունների ու բժիշկների նկատմամբ մեծացել է:  Կարելի է հարցը լուծել երկու ճանապարհով»,- հավելեց սոցիոլոգն ընդգծելով, որ դրանցից մեկը հղի կանանց հավաստագրեր տրամադրելն է, ինչն այսօր էլ գործում է, կամ մարզային բուժհաստատությունների ու մասնագետների որակը բարձրացնելը: Սոցիոլոգն առաջարկեց հարցի լուծման երկու ճանապարհ, միաժամանակ նշելով . «Վաուչեր տալով հիմնարկներում կգոյանան հերթեր, իսկ մարզերում կդատարկվեն բուժհաստատությունները»,- նշեց Ա. Ադիբեկյանը:

Անդրադառնալով կեսարյան հատումներին` Ա. Ադիբեկյանն ընդծեց, որ այն ևս խթանում է ծննդաբերության նվազմանը. «Այն ավելի թանկ հաճույք  է, քան նորմալ ծննդաբերական գործընթացը: Բացի դա`վիրահատելով վնասում են կնոջ առողջությունը, ով երկրորդ անգամ չի կարող ծննդաբերել»,- նկատեց նա: Այստեղ լրագրողը հակադարձելով նշեց, որ ըստ գործող օրենքի`Հայաստանում կանայք կարող են մի քանի անգամ ենթարկվել կիսարյան հատման, որն իրականացվում է անվճար հիմունքով: Սոցիոլոգը պատասխանեց, թե մարզային կենտրոններում այն իրականացվում է վճարովի հիմունքներով: «Եվ երկրորդ անգամ վիրահատվելով, հնարավոր է զրկվի հետագայում ևս մեկ անգամ ծննդաբերելուց: Կրկնում եմ` եթե գնում ենք նրան, որ ստեղծվեն որակյալ մասնագիտական բուժհաստատություններ` դա դրական միտում ունի, իսկ եթե պետք է խոչընդոտվի մարզերում բնակվող հղի կանանց` Երևանում ծննդաբերելու իրավունքը, դա բացասական է»,- ասաց նա շարունակելով, որ գյուղերում ոչ բոլոր բնակիչները կարող են իրենց թույլ տալ հարսների համար նորմալ և հուսալի ծննդաբերություն ապահովել: «Հարուստներն, իհարկե, կաշխատեն իրենց հարսների համար բարեկարգ պայմաններ ապահովել, իսկ նրանք, ովքեր չունեն գումար` կզրկվեն  այդ իրավունքից»,- նշեց սոցիոլոգը:

Հարցեր, պատասխաններ, մեկնաբանություններ