Մարզի բնակիչը` իր մարզում, Երևանի բնակիչը` Երևանում. Հավաստագրերը կտեղայնացվեն

2013 թվականի հունվարի 1-ից Ծննդօգնության և երեխայի առողջության պետական հավաստարագրերը կտեղայնացվեն, ինչի կապակցությամբ մատուցվող ծառայությունների կազմակերպման գործընթացում կկատարվեն համապատասխան փոփոխություններ: Այս մասին այսօր առողջապահության նախարարությունում կայացած գործակարգավարական խորհրդակցության ժամանակ հայտնել է նախարար Դերենիկ Դումանյանը: 

Նշենք, որ Խորհրդակցությանը մասնակցել են մարզպետարանների առողջապահության վարչությունների ու բաժինների պետերը, ովքեր ներկայացրել են մարզային ենթակայության բուժհաստատություններում առկա իրավիճակը, ընթացիկ խնդիրները:

Նախարարության մամուլի ծառայության հաղորդմամբ, նախարար Դումանյանը տեղեկացրել է, որ կկանոնակարգվեն ծննդաբերների և մինչև 7 տարեկան երեխաների ուղեգրման և հիվանդանոցային բուժօգնության կազմակերպման ընթացակարգերը: Մասնավորապես, նորմալ ընթացքով, առանց ռիսկի ծննդաբերների ծննդաբերությունը կկազմակերպվի վարչատարածքային սկզբունքով, ինչը ենթադրում է, որ հղին ծննդօգնության ծառայություն մատուցող բժշկական կազմակերպությունը կարող է ընտրել ըստ իր բնակության վայրի. մարզի բնակիչը` իր մարզում, Երևանի բնակիչը` Երևանում:

Մարզերից դեպի մայրաքաղաք հիվանդների անհիմն հոսքը կանխելուն ուղղված հերթական այս քայլի շնորհիվ` կապահովվի բժշկական համապատասխան ծառայությունների համար հատկացված պետական միջոցների հասցեականությունը։ 

ՀՀ առողջապահության նախարարությունում այժմ մշակվում է ծննդկանների և երեխաների ուղեգրման կարգը` ըստ ծննդօգնության և մանկաբուժական ծառայության կազմակերպման մակարդակների:

Դերենիկ Դումանյանը կարևորել է տեղերում շահառուների իրազեկումը` շեշտելով, որ այդ ծառայություններն իրականացնելու համար բոլոր մարզերում կան ժամանակակից սարքավորումներով հագեցած և նեղ մասնագետներով ապահովված բժշկական կենտրոններ։

Հարցեր, պատասխաններ, մեկնաբանություններ