Առողջապահության փոխնախարարը վստահեցնում է, որ առաջիկայում մանկաբուժության ոլորտում ավելի լավ ցուցանիշներ կարձանագրեն

«Չնայած վերջին 20 տարիներին Հայաստանում նկատվում է մանկական մահացության կրճատում, սակայն նորածնային մանկաբուժության, երեխաների սնուցման, դպրոցահասակների և դեռահասների առողջության պահպանման առումով դեռևս լուրջ խնդիրներ կան»: Այս մասին ասաց ՀՀ Ազգային ժողովի առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանը` Երևանում այսօր մեկնարկած մանկաբուժական ազգային երրորդ գիտաժողովում: 

Նշենք, որ գիտաժողովին մասնակցում են շուրջ 350 մանկաբույժ Հայաստանի բոլոր մարզերից և Լեռնային Ղարաբաղից: Գիտաժողովը կազմակերպել է «Մանկական բժիշկների հայկական ասոցիացիան»` ՀՀ առողջապահության նախարարության աջակցությամբ: 

Ա.Բաբլոյանը նշեց, որ Հայաստանում մանկաբուժությունը համարվում է առողջապահության ոլորտի գերակա ուղղություններից մեկը, ուստի վերջին տարիներին այդ ուղղությամբ իրականացվել են մի շարք բարեփոխումներ: «Բայց դա դեռ բավարար չէ, մենք պետք է կարողանանք այնպիսի ջանքեր ներդնել, որպեսզի զարգացնենք առաջին օղակի մանկաբուժությունը` կլինի դա ընտանեկան բժիշկների, թե մանկաբույժների մակարդակով, սակայն այդ հարցն այսօր օրակարգում է»,- նշեց Ա.Բաբլոյանը: 

ԱԺ պատգամավորի խոսքերով` այն փոքր ներդրումները, որոնք պահանջվում են երեխաների առողջության պահպանման առաջին մակարդակում, կարող են ունենալ ավելի մեծ արդյունքներ, քան տասնյակ անգամ ավելի մեծ ներդրումները երկրորդ կամ երրորդ մակարդակներում: Միաժամանակ նա նշեց, որ մարզերի համաչափ զարգացման ծրագրի շրջանակներում մարզային հիվանդանոցներում պետք է ներդրվեն այնպիսի ծառայություններ, որպեսզի երեխաները բուժում ստանան իրենց բնակավայրերում գտնվող հիվանդանոցներում: «Բոլորս էլ տեղյակ ենք, որ շատ հաճախ մարզերից մայրաքաղաք տեղափոխելու պատճառով կարող ենք ունենալ դժվարություններ, ինչպես նաև` կորուստներ»,- ասաց Ա.Բաբլոյանը: 

Այդուհանդերձ, նա նշեց, որ վերջին տարիներին կառավարության կողմից մարզային հիվանդանոցների վերակառուցման համար մեծ ներդրումներ են կատարվել, ուստի արդեն կարելի է ասել, որ մարզերում և մի շարք քաղաքներում կան այնպիսի հիվանդանոցներ, որոնք հագեցած են նորագույն սարքավորումներով: Խնդիրը, ըստ նրա, մնում է միայն մասնագետների վերապատրաստումը: 

ՀՀ առողջապահության փոխնախարար Սերգեյ Խաչատրյանը ողջունելով գիտաժողովի մասնակիցներին, նշեց, որ մանկական առողջությունը մեր երկրի գերակա խնդիրներից մեկն է, և վերջին տարիներին իրականացված բարեփոխումներն արդեն տվել են իրենց դրական արդյունքները: «Հաճախ միջազգային տարբեր միջոցառումների մասնակցելիս մեծ գոհունակություն եմ ապրում, երբ Հայաստանի ցուցանիշները համեմատում են այլ երկրների, այդ թվում` հարևան երկրների հետ, քանի որ բազմաթիվ ցուցանիշներով մենք գտնվում են շատ լավ դիրքերում: Դա մեզ համար մեծ հաջողություն է: Վստահ եմ, որ մանկաբույժների աշխատանքի արդյունքում առաջիկայում ավելի լավ ցուցանիշներ կունենանք»,- նշեց Ս.Խաչատրյանը: 

Նշենք, որ երկօրյա գիտաժողովի ընթացքում կներկայացվեն մանկաբուժության արդիական տարբեր խնդիրներին նվիրված դասախոսություններ և գիտական զեկուցումներ, ընդ որում դրանց մի մասը կներկայացնեն Մոսկվայից և Սանկտ-Պետերբուրգից հատուկ այդ նպատակով ժամանած հանրահայտ պրոֆեսորներ:

Հարցեր, պատասխաններ, մեկնաբանություններ