«Հայկական ժամանակ». Միս գնելիս զգոն եղեք. սիբիրախտով վարակման դեպքեր Հայաստանում

Հայաստանում սիբիրախտով մարդկանց վարակման դեպքեր են գրանցվել: Այդ մասին գրում է «Հայկական ժամանակ» թերթը։

«Երեկ մեզ հայտնի դարձավ, որ Վարդենիսում շուրջ տասը մարդ վարակվել է այդ հիվանդությամբ եւ գտնվում է «Մարտունի» բժշկական կենտրոնում (Գեղարքունիքի մարզ): Բուժկենտրոնի տնօրենի ժամանակավոր պաշտոնակատար Վարդան Կարապետյանը մեր թղթակցին փոխանցել է, որ բոլոր տասը դեպքերում սիբիրախտ ընդամենը կասկածվում է, եւ միայն լաբորատոր հետազոտության արդյունքների ստացումից հետո հնարավոր կլինի հստակ ասել` հիվանդների մոտ իսկապես սիբիրա՞խտ է, թե՞ ոչ:

Լաբորատոր հետազոտության արդյունքներն, ըստ նրա, հայտնի կդաոնան գալիք շաբաթվա սկզբին: Ավելի ուշ խնդրի առնչությամբ այս նույն պարզաբանումը մեր թղթակիցն ստացել է նաեւ ՀՀ առողջապահության նախարարությունից: ՀՀ ԳՆ սննդամթերքի անվտանգության պետական ծառայության լրատվության բաժնից էլ հայտնել են, որ ՀՀ առողջապահության նախարարությունը երկու օր աոաջ նամակով տեղեկացրել է այս ծառայությանը, որ Երեւանում սիբիրախտով վարակման մեկ դեպք է գրանցվել, եւ դա էլ կրկին առայժմ միայն կասկածվում է, փորձաքննության արդյունքները չկան: Նախարարությունն այս տեղեկության առնչությամբ մեր թղթակցին որեւէ մեկնաբանություն չի տվել:

«Նշենք, որ մարդիկ սիբիրախտով վարակվում են այդ հիվանդությունը կրող կենդանիների կամ մսեղենի հետ շփումից, ինչպես նաեւ սննդի մեջ վարակված միս կամ մսամթերք օգտագործելիս: Հիվանդությունը թեեւ բուժվում է, սակայն մահացության դեպքերը քիչ չեն: Սիբիրախտը մարդուց մարդուն չի փոխանցվում: Ամեն դեպքում, մինչ փորձաքննությունների արդյունքները հայտնի դառնան, եւ պարզվի` իրականում ինչն ինչոց է, շատ կարեւոր է, որ բնակչությունը զգոն լինի, անհրաժեշտ է գնել միայն սառնարաններում պահվող եւ համապատասխան փորձաքննություն անցած միս, անհրաժեշտ է նաեւ պահանջել փորձաքննություն անցնելու մասին վկայող կտրոնը` համոզվելու համար, որ միսը առողջ անասունի է: ՀՀ ԳՆ սննդամթերքի անվտանգության պետական ծառայությունը կոչ է անում, անկախ այս պատմությունից, սովորություն դարձնել եւ գնել միայն սառնարաններում պահվող եւ «առողջ» լինելու մասին վկայական ունեցող միս»,- գրում է «Հայկական ժամանակը»։

Հարցեր, պատասխաններ, մեկնաբանություններ