Այսօր տարածված են հիմնականում դեպրեսիաները, նևրոզները. Արմեն Սողոյան

Հոգեկան առողջությունը հոգեկան, ֆիզիկական ու սոցիալական լավակեցությունն է, ինչը յուրաքանչյուր անձի հնարավորություն է տալիս ինքնադրսևորվելու, դիմակայելու մարտահրավերներին և այլն: Հոգեկան առողջության վրա ազդող գործոնները բազմաթիվ են, որոնք կարող են լինել դրական ու բացասական: Ասուլիսում այս մասին ասաց Հայկական հոգեբուժական ասոցիացիայի նախագահ, համաշխարհային հոգեբուժական ասոցիացիայի պատվավոր անդամ Արմեն Սողոյանը:

Հոգեկան խանգարումները, ինչպես և մնացած խանգարումները, ըստ մասնագետի, առաջանում են որոշակի պայմաններում, ունեն բնածին բնույթ, նաև` պայմանավորված շրջակա միջավայրով: Այն խանգարումները, որոնք բնածին են, ժառանգական, բոլոր ժողովուրդների մոտ հիմնականում հավասարաչափ են բաշխված, հիմնականում դժվար բուժելի են: «Բոլոր հոգեկան հիվանդությունները բուժելի են միայն ժամանակին հայտնաբերելու դեպքում»,- ասաց հոգեբույժը:

Նրա ներկայացրած տվյալներով, Հայաստանում 44 հազար քաղաքացի այս կամ այն առնչությամբ դիմել են հոգեբուժական հաստատությունների: Սակայն, ըստ նրա, իմանալով հայերի մտածելակերպը, դիմում են մասնագետի այն ժամանակ, երբ ավելի խորացած է լինում հիվանդությունը, իսկ առաջին նշանների դեպքում խուսափում են: «Մենք պետք է սա հաղթահարենք ու հենց առաջին նշանների դեպքում անմիջապես դիմենք հոգեբանի»,- ասաց նա:

Ի՞նչն է նպաստում հոգեկան խանգարման առաջացմանը: Ըստ մասնագետի, կինը հղի ժամանակ պետք է խուսափի վատ սովորույթներից, վարի հանգիստ կյանք, ինչպես նաև` նորածնային շրջանում տարած ինֆեկցիաները, սթրեսները, տնտեսական վիճակը, ժառանգական փոխանցումը: Կանանց մոտ հիմնականում էմոցիոնալ խանգարումներն են գերակշռում: Այսօր տարածված են հիմնականում դեպրեսիաները, նևրոզները, ինչը, ըստ բանախոսի, բնական է անցումային շրջանում գտնվող երկրների համար:

Ամբողջ աշխարհում 450 միլիոն մարդ առնչվում է հոգեբուժական ծառայությունների հետ, յուրաքանչյուր չորսից մեկը իր կյանքի ընթացքում հոգեկան որևէ խնդիր է ունենում:

Հարցեր, պատասխաններ, մեկնաբանություններ