Ինչի՞ց են բողոքում հայ դեռահասները. բժշկի ուսումնասիրությունը

Դեռահասների վարքագիծը ամբողջ աշխարհում բժիշկների և հոգեբանների ուշադրության կենտրոնում է: Դեռահասն 10-19 տարեկան անձնավորությունն է, սա այն փուլն է, երբ սկսվում է երեխայի սեռական, հոգեկան, սոցիալական և մասնագիտական ձևավորման փուլը: Նրանք բնակչության 20 տոկոսն են կազմում:

Այսօր լրագրողների հետ հանդիպմանը «Արաբկիր» բժշկական համալիրին կից «Երեխաների և դեռահասների առողջության ինստիտուտի» ղեկավար Սերգեյ Սարգսյանը լրագրողների հետ հանդիպմանն ասաց, որ ծերացող երկիր համարվող Հայաստանում դեռահասների թիվն այդ ցուցանիշից ցածր է:

«Վերջին 15-20 տարվա հետազոտությունները ցույց են տվել, որ դեռահասները մարդկության առողջ հատվածը չեն: Այս տարիքում են հիմնականում լինում միտումնավոր և պատահական վնասվածքները, իսկ աշխարհում տարեկան ինքնասպան է լինում 90-100 հազար դեռահաս»,-ասաց նա:

Բժիշկը բացատրեց, որ հենց դեռահասության տարիքը մեծ դերակատարում ունի մարդու հետագա կյանքում, օրինակ, հետազոտությունները ցույց են տվել, որ վաղաժամ մահացության միայն 70 տոկոսը կապված է դեռահասության տարիքում ձեռք բերած վատ սովորությունների և կենսակերպի հետ: Այդ պատճառով, ազդելով դեռահասի կենսակերպի վրա հնարավոր է ձևավորել առողջ անձնավորություն:

«Ապացուցված է , որ առողջական բեռի մեջ կենսակերպն ունի 50 տոկոս ազդեցություն, գենետիկ ազդեցությունն ու էկոլոգիական միջավայրը` 20-ական տոկոս և միայն 10-15 տոկոսը` երկրի առողջապահական համակարգը: Այդ պատճառով է կարևորվում դեռահասների ուսումնասիրությունը»,-բացատրեց մասնագետը:

Հայաստանի բոլոր մարզերում դեռահասների շրջանում անցկացրած հետազոտության արդյունքում պարզվել է, որ բացի ֆիզիկական տարածված գանգատներից`գլխացավ, ատամնացավ, փորացավ կա մի յուրահատուկ խնդիր, որն առկա է գրեթե բոլորի մոտ` միայնության զգացում ու նյարդայնություն:

Սարգսյանի դիտարկմամբ, դրանք հիմնականում ուղեկցվում է մարմնի զանգվածի թյուր ընկալմամբ. «Հատկապես դեռահասների մոտ դա շատ հուզող հարց է: Աղջիկները գանգատվում են ենթադրյալ գիրությունից, տղաները` հակառակը: Եվ եթե եվրոպական ռեկորդը չնախաճաշելն է, հայերինը` սոված քնելը»:

Հարցեր, պատասխաններ, մեկնաբանություններ