Ուռուցքաբանության գերազանցության հայկական կենտրոնի ստեղծման աշխատանքների առաջին փուլը մեկնարկել է: Այսօր այս մասին լրագրողներին հայտնեցին Էկոնոմիկայի նախարար Ներսես Երիցյանն ու Ազգային մրցունակության հիմնդրամի տնօրեն Բեկոր Փափազյանը:

Հիշեցնենք, որ նման կենտրոնի ստեղծումը հիշյալ երկու կառույցների ու նաև առողջապահության նախարարության համատեղ ծրագիրն է:

Այսօր պայմանգիր է կնքվել «ԱյԲիԷյ» մոլեկուլյար ընկերության հետ` «Ցիկլոտրոն 18/18» ցիկլոտրոնի ձեռքբերման վերաբերյալ: «Սարքավորումն անհատականցված բուժման հնարավորություն է տալիս, այնքան ճշգրիտ ախտորոշում է անում, որ տվյալ հիվանդի համար կոնկրետ բուժման եղանակ է ընտրվում: Դրանով է այն հայտնի դարձել աշխարհում ու արագ տարածում գտել զարգացող երկրներում»,-սարքավորման առանձնահատկությունները ներկայացրեց «ԱյԲիԷյ» մոլեկուլյար ընկերության մարքեթինգի և վաճառքի տնօրեն Փիթեր Լեիթները:

Նշենք, որ այն արտադրելու է ուռուցքային և սրտանոթային հիվանդությունների ախտորոշման, քաղցկեղի բուժման համար անհրաժեշտ միջուկային իզոտոպներ: Կարճ ապրող իզոտոպը, ներմուծվելով արյան մեջ, ճառագայթում է, ցույց տալով ուռուցքը և օգնելով վիրաբույժին ճշգրիտ պլանավորելու վիրահատությունը: Մոտավոր հաշվարկներով, հիվանդի համար այս ծառայությունը կարժենա 1200-1300 դոլար, ինչը, ըստ բանախոսների, ավելի մատչելի է, քան այլ երկիր մեկնելն ու այնտեղ բուժվելը: Բ. Փափազյանի ներկայացրած տվյալներով, ամեն տարի Հայաստանից 600 մարդ գնում է արտասահման ու վճարովի հիմունքով բուժում անցնում: Ն. Երիցյանն ասաց, որ իզոտոպների արտադրությունը կսկսվի մոտ երկու տարի անց, այդ ժամանակ էլ հնարավոր կլինի իրականացնել բուժում, նաև արտահանել:

Էկոնոմիկայի նախարարը հաշվարկել է, որ Ուռուցքաբանության գերազանցությանն հայկական կենտրոնի ստեղծման համար կպահանջվի մինչև 5 տարի, ծրագիրը բաղկացած է երկու փուլից: «Բայց եթե մասնավոր ներդրումներ լինեն, այդ աշխատանքները կարագացվեն»,-ասաց նա, ապա հավելեց, որ ներդրումներն արդեն արդյունք կտան 2-2.5 տարի անց: Նա նաև կանխատեսում է, որ նման ծրագրի իրականցումը կնպաստի նաև բժշկական ապահովագրության զարգացմանը:

Հնարավոր ներդրողներին կառավարության անդամը վստահեցնում է, որ իրենց միջամտությունն այս գործին լուրջ է: Պետությունը պատրաստվում է ֆիզիկայի ինստիտուտի տարածքից 10 հազար քմ տարածք հատկացնել կենտրոնի ստեղծման համար, կհայտարարվի մրցույթ ներդրումային ծրագրերի համար: Սա հնարավորություն կտա զարգացնել նաև ֆիզիկայի ինստիտուտը, մտադիր են այստեղ իզոտոպների գերարագ արտադրություն կազմակերպել, սրա իրականացման համար արդեն 10-15 տարի կպահանջվի: «Բավականին թանկ ծրագիր է, որը մենք պետք է կարողանանք անել»,-ասաց Ն. Երիցյանը:

Պրոտոնային արագացուցիչի ձեռքբերման համար 5 մլն եվրո վարկ ձեռքբերելու պայմանգիր է կնքվել բելգիական «ՔեյԲիՍի» բանկի հետ: Վարկի մարման ժամկետը 10 տարի է, երեք տարի արտոնյալ պայմաններով, 0 տոկոս տոկոսադրույքով: Նշենք, որ տարածաշրջանում նման սարքավորում կա Թեհրանում, Մոսկվայում, Ստամբուլում: