Համավճարի ներդրումը վերացնում է կոռուպցիոն հիմքը. Արա Բաբլոյան

Ամփոփվել են Արաբկիր բժշկական կենտրոնում 3 ամիսների ընթացքում իրականացվող համավճարի ներդրման համակարգի պիլոտային ծրագրի արդյունքները։ Այս մասին այսօրվա ասուլիսին ասաց ՀՀ ԱԺ Առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանը։

«Երեք ամիսների ընթացքում որո՞նք են մեր դասերը։ Կարծում եմ, որ եթե մենք կարողանանք ազնվությամբ իրականացնել այս ծրագիրը, ապա, մի կողմից, մենք կտեսնենք, թե ի՞նչ եկամուտներ են օրինական ճանապարհով մտնում հիվանդանոց, և ինչպե՞ս են այս ռեսուրսները բաշխվում, և երկրորդ, մենք դուրս ենք գալիս այդ համակարգից, որը կոչվում է կոռուպցիոն, որովհետև այս ծրագրով կոռուպցիայի հիմքը վերացվում է»,– ասաց նա։

Երրորդը, ըստ բանախոսի, պարզ է դառնում, թե ո՞րն է այն ծախսային հատվածը, որը մնում է որպես բեռ բնակչության վրա։ «Պետությունն իր ծրագիրը մշակելիս կամաց–կամաց փակում է այդ հատվածները»,– ասաց նա։

Բացի դրանից, պարզվել է, որ հիվանդանոցները վճարել են եկամտահարկի և սոցիալական վճարների միջինը 65 տոկոսը։

«Այսինքն հասարակության և պետության համար գոյություն ունեին թաքցված, կորած գումարներ, որոնք չէին մասնակցում պետության ծրագրերի աջակցմանը։ Հիմա այդ գումարները գնում են բյուջե»,– պարզաբանեց նա։

Հարցեր, պատասխաններ, մեկնաբանություններ