Հայաստանում թանկանում են դեղամիջոցներն ու բուժսպասարկումը

Ուսումնասիրելով Ազգային վիճակագրական ծառայության տվյալները` պարզ է դառնում, որ անցած տարվա համեմատ մեր երկրում թանկացել են և՛ դեղամիջոցները, և՛ բուժսպասարկումը:

Այս տարվա առաջին կիսամյակում` անցած տարվա նույն ժամանակի համեմատ Հայաստանում ոչ պարենային ապրանքները թանկացել են 5.3 տոկոսով և դրանցից ամենաարագը թանկացել են դեղամիջոցները` միանգամից 8.3 տոկոսով:

Ծառայությունների գները նույն ժամանակում բարձրացել են ընդամենը 2.6 տոկոսով, սակայն բուժսպասարկումը թանկացել է միանգամից 11.5 տոկոսով: Այստեղ թանկացմամբ հատկապես աչքի են ատամնաբուժական ծառայությունները:

Այս տարվա հունվար-հունիսին` անցած տարվա նույն ժամանակի համեմատ ատամների բուժումը թանկացել է 15.5 տոկոսով, իսկ պրոթեզավորումը` 12.3 տոկոսով:

Ըստ ԱՎԾ տվյալի` այդ ժամանակահատվածում ոլորտում էժանացել է միայն «Ամպիցիլին» դեղամիջոցը` 3.3 տոկոսով:

Հարցեր, պատասխաններ, մեկնաբանություններ