Զբոսաշրջության երրորդ եւ դեղագործության առաջին «Ամառային դպրոց»

Զբոսաշրջության եւ դեղագործության ոլորտներում կրթության որակը բարձրացնելու, ինչպես նաև կրթական հաստատություններում ուսուցանվող գիտելիքների ու գործատուի կարիքների միջև անհամապատասխանությունը հարթելու նպատակով ԱՄՆ ՄԶԳ ֆինանսավորմամբ իրականացվող «Մրցունակ մասնավոր հատված Հայաստանում» (CAPS) ծրագրի և Հայաստանում Ամերիկյան Համալսարանի հատուկ դասընթացների ծրագրի նախաձեռնությամբ հուլիսի 12-30-ը երկու ուղղություններով կանցկացվեն ամառային դասընթացներ:

Ինչպես նշում են կազմակերպիչները, զբոսաշրջության ոլորտի համար դասընթացներին կմասնակցեն Եվրոպական տարածաշրջանային ակադեմիայի, Երևանի պետական հումանիտար քոլեջի, Երևանի Զբոսաշրջության, սպասարկման և սննդի արդյունաբերության հայ-հունական պետական քոլեջի, Ռուս-հայկական (Սլավոնական) համալսարանի, Երևանի պետական համալսարանի (ԵՊՀ), Վ. Բրյուսովի անվ. պետական լեզվաբանական համալսարանի երկրորդ, երրորդ և չորրորդ կուրսերի մոտ 40 ուսանող, եւ, համապատասխանաբար, 30 ուսանող դեղագործության ոլորտը ուսումնասիրող` Երեւանի Մ.Հերացու անվան պետական բժշկական համալսարանից, ԵՊՀ դեղագործական քիմիայի ֆակուլտետից, Մեհրաբյան բժշկական ինստիտուտից:

Դասընթացների մասնակիցները գիտելիքներ կստանան իրենց ոլորտների ամենատարբեր սեգմենտների վերաբերյալ, կքննարկեն առանձին մասնագիտությունների համար պահանջվող անհրա¬ժեշտ հմտություններն ու գիտելիքները, կծանոթանան տվյալ բնագավառում բիզնեսի կազմակերպման եւ կառավարման միջազգային փորձին, կսովորեն մշակել ռազմավարական հայեցակարգ, ձեւավորել աշխատանքային պլան եւ համագործակցել արտասահմանյան գործընկերների հետ: Դասընթացները կվարեն CAPS ծրագրի մասնագետները եւ ոլորտների առաջատար ընկերությունների ղեկավարները: «Ամառային դպրոցի» շրջանավարտները CAPS ծրագրի կողմից կստանան մասնակցության վկայականներ:

Հարցեր, պատասխաններ, մեկնաբանություններ