Քննարկվել են դեղերի շրջանառության կարգավորման խնդիրները

Այսօր, կավարտվի առողջապահության նախարարության Դեղերի և բժշկական տեխնոլոգիաների փորձագիտական կենտրոնում նախօրեին մեկնարկած «Դեղերի շրջանառության կարգավորումը և Եվրամիության լավագույն փորձը» խորագրով աշխատանքային խորհրդաժողովը:

Ինչպես Panorama.am-ին տեղեկացրին նախարարության Դեղերի և բժշկական տեխնոլոգիաների փորձագիտական կենտրոնից, խորհրդաժողովը կազմակերպվել է կենտրոնի նախաձեռնությամբ` Եվրոպական հանձնաժողովի Տեխնիկական աջակցության և տեղեկատվության փոխանակման «Թայեքս» ծրագրի շրջանակներում:

Խորհրդաժողովում քննարկվել են դեղերի շրջանառության կարգավորմանը, մասնավորապես, դեղերի գրանցմանն առնչվող Եվրամիության օրենսդրությունը, լավագույն փորձը և համագործակցության հեռանկարները: Խորհրդաժողովի ընթացքում քննարկվել է նաև Եվրոպայում դեղերի գրանցման նպատակով դեղերի անվտանգության, արդյունավետության և որակի արժևորման ընթացակարգերը: Հիմնական զեկուցումներով հանդես են եկել Եվրամիության փորձառու մասնագետներ` Պասքալինո Ռոսսինը Իտալիայի առողջապահության նախարարությունից, Ռոբերտո Կոնոչիան Իտալիայի և Յորգան Շոմախերսը` Գերմանիայի դեղերի գործակալությունից:

Դեղերի գրանցման գործընթացը դեղերի շրջանառության կարգավորման առանցքային օղակն է, որակի ապահովման համակարգի հիմքը, որի հետ սերտորեն կապված են արտադրության և ներկրման հավատարմագրումը, տեսչական մասնագիտական հսկողությունը, կողմնակի ազդեցությունների դիտարկումը, տեղեկատվության ապահովումը: Ահա թե ինչու է նախաձեռնվել դեղերի գրանցման պահանջներն ու ընթացակարգերը եվրոպական օրենսդրությանը ներդաշնակեցնելու գործընթաց, որի արդյունավետ իրականացմանը մեծապես կնպաստի այս խորհրդաժողովի կազմակերպումը Երևանում:

Հարցեր, պատասխաններ, մեկնաբանություններ