«Բուժում է Վարդանանցը» գրքի եռահատոր ժողովածուն ներկայացվեց հանրությանը

Փետրվարի 21-ին Հայաստանի ազգային պատկերասրահում կայացավ «Բուժում է Վարդանանցը» գրքի եռահատոր ժողովածուի  հանդիսավոր շնորհանդեսը։ Հատորը ներառում է 371 բուժման գործելակարգ, որտեղ ներկայացված են տարածված հիվանդությունների ախտորոշման և բուժման ժամանակակից մոտեցումները՝ հիմնված ապացուցողական բժշկության վրա։

Միջոցառումը համախմբեց մասնագիտական համայնքին՝ գիտելիքի փոխանակման և առողջապահական ոլորտի զարգացման կարևոր քննարկումների շուրջ։

Իր խոսքում «Վարդանանց» ՆԲԿ գլխավոր տնօրեն Լևոն Ալթունյանը նշեց, որ «Վարդանանց»-ը, որպես տեղամասային պոլիկլինիկա, սպասարկում է մոտավորապես 96,000 պացիենտ, և դրա հետ մեկտեղ՝ մոտավորապես 50,000 ապահովագրված անձ: Այսպիսով, կենտրոնի ծառայություններից օգտվում է, ընդհանուր առմամբ, մոտավորապես 150,000 բնակիչ։ Նա ընդգծեց, որ այս ծավալը կենտրոնի գործունեությունը տեղափոխում է հանրային առողջապահության տիրույթ, որի հիմնական գերխնդիրներից է պացիենտների համար ապահովել ո՛չ միայն բժշկական օգնության հասանելիություն, այլև` բարձր որակ։

Անդրադառնալով «Բուժում է Վարդանանցը» ժողովածուի նշանակությանը՝ Լևոն Ալթունյանը նշեց, որ, թեև այն հիմնականում նախատեսված է բուժող բժիշկների համար, դրա արժեքը զգացվում է նաև ավելի լայն համատեքստում։ «Ինչպես փորձառու երաժշտասերը սիմֆոնիա է լսում՝ պարտիտուրան ձեռքին, այնպես էլ այսօր շատ բուժառուներ բժշկի են դիմում՝ արդեն իսկ խորհրդակցած արհեստական բանականության հետ։ Այս պայմաններում առանձնահատուկ կարևոր է, որ բժիշկը խոսի նույն մասնագիտական լեզվով։ Դա ձևավորում է վստահություն, իսկ վստահությունը՝ պացիենտի ներգրավվածություն բուժման գործընթացում, բուժման հաջողության ամենակարևոր բաղադրիչներից է»,— ասաց Լևոն Ալթունյանը։

«Վարդանանց» ՆԲԿ Մասնագիտական գերազանցության  կենտրոնի տնօրեն, գրքի խմբագրական խորհրդի  ղեկավար Հարություն Մանգոյանը նշեց, որ ժողովածուն ներառում է հիվանդությունների կլինիկական պատմություններ և դրանց բուժմանն ուղղված ուսումնասիրություններ. «Այո՛, խոսքը հիմնականում ամենատարածված հիվանդությունների մասին է։ Այն կոչվում է ժողովածու, որովհետև այնտեղ այբբենական կարգով ներկայացված են գրեթե բոլոր հիվանդությունները՝ վարակային, նյարդաբանական, սրտաբանական, հոդաբանական և այլն»։

Մանգոյանն ընդգծեց. «Սա շտեմարանի նման ռեսուրս է, որը հատկապես օգտակար կլինի առաջնային օղակի բժշկի համար՝ վստահելի աղբյուրից տեղեկատվություն ստանալու համար։ Նորամուծությունների՝ արհեստական բանականության և այլ գործիքների առումով խնդիր չկա, քանի որ գիրքը ադապտացված է Հայաստանի պայմաններին, հեղինակված է բժիշկների կողմից և վերանայված մեկ այլ բժիշկի կողմից»։

Հ․ Մանգոյանը շեշտադրեց հեղինակային մոտեցման կարևորությունը. «Սա ոչ թե պարզապես նյութ է, այլ Վարդանանցի բժիշկների հեղինակած աշխատանքը, և այստեղ ակնառու է Վարդանանցի ձեռագիրը։ «Բուժում է Վարդանանցը» ձևակերպմամբ  մենք ուզում ենք ցույց տալ մեր ձեռագիրը. առաջինը՝ այո՛, մենք բուժում ենք, և երկրորդը՝ այո՛, սա մեր ձեռագիրն է, և ուրախ ենք, որ կարող ենք կիսվել այդ ձեռագրով»։

ՀՀ ԱՆ ընտանեկան բժշկության գծով խորհրդատու Սամվել Հայրումյանը նշեց. «Որպես ընտանեկան բժիշկ՝ խորհուրդ կտամ այս գիրքն ունենալ որպես սեղանի գիրք, քանի որ նման միասնական ձեռնարկ առայսօր բացակայում էր։ «Վարդանանց» բժշկական կենտրոնի նախաձեռնությամբ այդ բացը լրացվել է։ Գիրքն օգնում է հստակ կողմնորոշվել՝ որ դեպքերում ընտանեկան բժիշկը կարող է ինքնուրույն կազմակերպել պացիենտի բուժումը, իսկ որ դեպքերում՝ ուղղորդել նեղ մասնագետի։ Ներկայացված բուժման մոտեցումները հիմնված են ապացուցողական բժշկության վրա և նպատակ ունեն բացառելու ավելորդ դեղերի նշանակումը»։

Հարցեր, պատասխաններ, մեկնաբանություններ