ՀՀ ԱՆ. Անահիտ Ավանեսյանն ընդունել է գերմանացի դոկտոր Ինգո Բերգմանի գլխավորած պատվիրակությանը

Կարևորելով պետության կողմից երաշխավորված անվճար պայմաններով հեմոդիալիզային բժշկական օգնության և սպասարկման ծառայության հասանելիության ապահովումը և նորագույն մեթոդների կիրառումը` առողջապահության նախարար Անահիտ Ավանեսյանն ընդունել է գերմանացի դոկտոր Ինգո Բերգմանի գլխավորած պատվիրակությանը, որի կազմում են Գերմանիայի և Շվեյցարիայի անվանի բժիշկներ և փորձագետներ:

Ինգո Բերգմանը մեծ ներդրում է ունեցել Գերմանիայում դիալիզի ծառայությամբ բազմապրոֆիլ կենտրոնի կառուցման և Շվեյցարիայում առաջին էքստրակորպորալ թաղանթային թթվածնացման (/ECMO/ արյունը թթվածնով հագեցնելու ինվազիվ արտամարմնային մեթոդ սուր շնչառական անբավարարության զարգացման դեպքում) մեթոդի ներդրման աշխատանքներում:

Պատվիրակության անդամներն առաջիկա օրերին կշրջեն հայաստանյան մի շարք բուժկենտրոններում, կլինեն «Սուրբ Գրիգոր Լուսավորիչ» բժշկական կենտրոնում` տեղի մասնագետների հետ քննարկելու հեմոդիալիզի ծառայության ընդլայնման հնարավորությունները, պրակտիկ իրացման հարցերը:

«Ես պատրաստ եմ աջակցել ցանկացած նախաձեռնությանը, որը մեր քաղաքացիների համար կապահովի առողջական լավագույն ելքերը: Կարևոր է Գերմանիայի և Շվեյցարիայի գործընկերների հետ այս համագործակցության մեկնարկը, փորձի փոխանակման հնարավորությունը, ժամանակակից բժշկության մեթոդների կիրառումը»,- նշել է Անահիտ Ավանեսյանը:

Հեմոդիալիզի ծառայությունը Հայաստանում մատուցվում է պետական պատվերի շրջանակում, իսկ Գերմանիայում ծառայության ծախսերը հոգում է ապահովագրությունը:

Պատվիրակությունը հետաքրքրվել է Հայաստանում երիկամի փոխպատվաստման ծառայության փորձից, որին ի պատասխան` նախարարը ներկայացրել է ներկա արդյունքները, խոսել դիակային դոնորության իրավական կարգավորումների ընթացքից:

Հարցեր, պատասխաններ, մեկնաբանություններ