Հայաստանը բժշկական տուրիզմի երկիր՝ ԱՄԲ ծրագրով. morevmankan.am

ԱՄԲ միջոցով երեխա ունենալ ցանկացող օտարերկրացիների թիվը վերջին տարիներին էապես ավելացել է, ինչը վկայում է, որ Հայաստանում ծառայությունը գտնվում է բարձր մակարդակի վրա։ Հատկապես մեծ է հոսքը Ռուսաստանից և Չինաստանից։

Մեր կենտրոնում իրականացվում է փոխնակ մայրության ամբողջ գործընթացը երկու տարբերակով՝ կամ արտերկրի բուժառուներն ուղարկում են իրենց կողմից պահպանված սաղմերը, կամ գալիս են Հայաստան և սաղմերը սառեցվում են տեղում, ապա այլ երկրներում գտնում են  փոխնակ մայր, կնքում  անհրաժեշտ պայմանագիրը, նորից վերադառնում՝ գործընթացը շարունակելու համար:

Կարևոր է այն, որ դրա արդյունքում փոխնակ մայրերի քանակը Հայաստանում չի պակասում, քանի որ, որպես կանոն, ԱՄԲ ծրագրով դիմողներն իրենց հետ բերում են նաև փոխնակ մայրերին:

Մոր և մանկան առողջության պահպանման ԳՀԿ դիմած երկրները, միանշանակ, մերժվում են, եթե մեր երկրի փոխնակ մայրերի հարցն են բարձրացնում:

Մեր երկրում, փաստորեն, ամբողջ գործընթացն իրականացվում է բժշկական տուրիզմի շրջանակում: Ընտանեկան զույգերը մնում են մեր երկրում մինչև ծննդաբերությունը: Ի վերջո, երեխայի ծննդից հետո կատարվում են բոլոր անհրաժեշտ ձևակերպումները, հետազոտությունները, հետո միայն վերադառնում իրենց երկիր: Այդ ամբողջ ժամանակը նրանք անցկացնում են Հայաստանում:

Ընդ որում, արտերկրի բուժառուների համար ամբողջ գործընթացը վճարովի է (դեղորայքը, հետազոտությունները, հսկողությունը, ծննդաբերությունը կամ կեսարյան հատումը), ինչը բավականին մեծ ֆինանսական հոսք է ապահովում մեր երկրի տնտեսության համար: Հույս ունենք, որ այդ հոսքը կավելանա:

«Ուրախ եմ, որ շատերն ընտրել են մեր կենտրոնը: Պատճառը գուցե նա է, որ մենք առաջինն ենք սկսել այս գործընթացը, և երկար տարիներ եղել ենք առաջատարը: Գալիս են արդեն հասցեական, անգամ կոնկրետ բժշկի անուն տալով, որին դիմել  է իրենց ազգականը և գոհունակ, իր բալիկի հետ վերադարձել է տուն: Ի դեպ, չինացիների հետ բավականին դժվար է աշխատելը՝ չափազանց շատ են մանրամասներ հարցնում, փորձում են ամեն բան հասկանալ, ճշտել, պահանջում են լուրջ գենետիկ հետազոտություններ». իր խոսքում նշում է ԱՄԲ ծառայության ղեկավար պրոֆեսոր Գեորգի Օկոևը:

Հարցեր, պատասխաններ, մեկնաբանություններ