ԵՊԲՀ. Իրավական կարգավորումները՝ մասնագետների ուշադրության կենտրոնում. շարունակվեց քառօրյա դասընթացների շարքը

«Առողջապահության բնագավառի իրավական կարգավորումների արդի հիմնահարցերը» խորագրով կրեդիտավորված քառօրյա անվճար դասընթացների շարքը շարունակվեց «Մուրացան» համալսարանական հիվանդանոցի բուժաշխատողների համար:

Առողջապահական ծրագրերի ազգային գիտահետազոտական կենտրոնի ղեկավար, Հանրային առողջության և առողջապահության կազմակերպման ամբիոնի ավագ դասախոս Դավիթ Մելիք-Նուբարյանը խոսեց «Խտրականության դրսևորումներն առողջապահության բնագավառում և դրանց կանխարգելմանն ուղղված իրավական կարգավորումները» թեմայով:

Նրա խոսքով՝ դասընթացը լավ հնարավորություն է, որպեսզի բուժաշխատողները կարողանան ծանոթանալ օրենսդրությանը և խուսափեն մասնագիտական գործունեության մեջ սխալներ թույլ տալուց:

«Այսօր կխոսենք պրակտիկ դեպքերի մասին, որոնց կարող ենք բախվել առողջապահության բնագավառում, ինչպես նաև իրավական կարգավորումների մասին, որովհետև բուժաշխատողները այդքան էլ լավ չեն տիրապետում իրավական ակտերին, և գործնականում հնարավոր է թույլ տան այնպիսի գործողություններ, որոնք հակասում են օրենսդրությանը: Հաշվի առնելով, որ օրենքները դժվար է կարդալ և ընկալել, ինչպես նաև այն հանգամանքը, որ բուժաշխատողները գերծանրաբեռնված են իրենց աշխատանքով, այդ պատճառով միտք առաջացավ դասընթացի միջոցով ծանոթացնել ձեզ իրավական կարգավորումներին»,- միջոցառման մեկնարկին նշեց Դավիթ Մելիք-Նուբարյանը՝ անդրադառնալով առողջապահական համակարգում խտրականության դեպքերին:

Քառօրյա դասընթացները կշարունակեն Առողջապահական իրավունքի խմբի վարիչ, Իրավաբանական բաժնի պետ Մելիք Սողոմոնյանը «Մարդու իրավունքներ, աշխատանքային իրավունք» և «Բժիշկների և պացիենտների իրավունքները և պարտականությունները» թեմաներով և Առողջապահական իրավունքի խմբի դասախոս, դոցենտ Նաիրա Զոհրաբյանը «Բժշկական քրեական իրավունք» թեմայով դասախոսություններով:

Նշենք, որ ավագ և միջին բուժաշխատողներին կտրամադրվի 5 տեսական ՇՄԶ կրեդիտ:

Հարցեր, պատասխաններ, մեկնաբանություններ