ՀՀ ԱՆ. Հայաստանում կբացվի քաղցկեղի ժառանգական նախատրամադրվածության կլինիկա

«Առողջության պահպանման իրավունքը երեխաների հիմնարար իրավունքն է, և մենք պարտավոր ենք ապահովել նրանց առողջ մեծանալու, ինչպես նաև, անհրաժեշտության դեպքում, հավասարապես բուժում ստանալու իրավունքը»,- Ռ. Օ. Յոլյանի անվան արյունաբանական կենտրոնում, շնորհավորելով բոլոր երեխաներին, նշել է առողջապահության նախարար Անահիտ Ավանեսյանը:

Երեխաների պաշտպանության միջազգային օրը Հայաստանի երեխաների առողջության հիմնադրամի և ԱՆ Ռ. Օ. Յոլյանի անվան արյունաբանական կենտրոնի միջև կնքվել է համագործակցության հուշագիր, ըստ որի` արյունաբանական կենտրոնում բացվելու է «Կարինայի անվան քաղցկեղի ժառանգական նախատրամադրվածության կլինիկան»:

Մանկական քաղցկեղը կանխարգելելու համար այս կլինիկայում հետազոտվելու են քաղցկեղի ժառանգական նախատրամադրվածություն ունեցող երեխաները: Այսպես հնարավոր է լինելու կանխարգելել կամ վաղ փուլում հայտնաբերել հիվանդությունը:

Կլինիկայում հետազոտվելու են նաև արդեն բուժված երեխաները հիվանդության կրկնվելը կամ արտահայտումները կանխելու նպատակով:

Հայաստանի երեխաների առողջության հիմանադրամի տնօրեն Արմեն Մարտիրոսյանը, կարևորելով մեր երկրում քաղցկեղի վաղ փուլում հայտնաբերումը, նշել է. «Ուրախ ենք, որ այսօր հնարավորություն ունենք ֆինանսավորել նման կարևոր կենտրոնի ստեղծումը, որը կնպաստի երեխաների շրջանում քաղցկեղի վաղ հայտնաբերմանն ու կանխարգելմանը, արդյունավետ բուժմանը, արդյունքում՝ քաղցկեղի տարածվածության ու մահացության նվազեցմանը Հայաստանում և Արցախում»:

Այս գաղափարի կյանքի կոչմանը աջակցել են նաև Կարինա Պետրոսյանի ծնողներն, ում ոսկրածուծի փոխպատվաստման համար հավաքած ամբողջ գումարը փոխանցել են կենտրոնի բացմանը` ժամանակին ախտորոշելու և կյանքեր փրկելու հնարավորության համար:

Արյունաբանական կենտրոնում առողջապահության նախարարը շրջել է Արյան բանկի նոր շենքի կառուցման շինհրապարակում, ծանոթացել կատարվող աշխատանքների ընթացքին:

Հարցեր, պատասխաններ, մեկնաբանություններ