ԵՊԲՀ. Բժշկական գենետիկայի օրերը Հայաստանում շարունակվում են․ կայացավ 3-րդ գործնական գիտաժողովը

ԵՊԲՀ բժշկական գենետիկայի ամբիոնը և Բժշկական գենետիկայի և առողջության առաջնային պահպանման կենտրոնը մարտի 11-ին կազմակերպել էին «Բժշկական գենետիկայի պրակտիկ ասպեկտները» թեմայով արդեն 3-րդ գործնական գիտաժողովը։

Գենետիկայի ոլորտի հերթական կարևոր և օգտակար միջոցառումն իր տանիքի ներքո էր համախմբել հայ, ռուս և վրացի մասնագետներին։

Գիտաժողովը վարեցին Բոչկովի անվան ԴՊԲԳՀ (ФГБНУ) բժշկական գենետիկայի կենտրոնի առաջատար մասնագետները։

Ողջույնի խոսքով հանդես եկավ ԵՊԲՀ բժշկական գենետիկայի ամբիոնի վարիչ, Բժշկական գենետիկայի և առողջության առաջնային պահպանման կենտրոնի ղեկավար, կենսաբանական գիտությունների դոկտոր, ԵՄ ARICE ծրագրի առաջատար փորձագետ Թամարա Սարգսյանը։

Բոչկովի անվան ԴՊԲԳՀ բժշկական գենետիկայի կենտրոնի ժառանգական հիվանդությունների և սելեկտիվ սկրինինգի լաբորատորիաների ղեկավար Եկատերինա Զախարովան ներկայացրեց «Մեկ թեստ՝ բազմաթիվ հիվանդություններ․ գենետիկ վահանակներ» խորագրով զեկույցը։

Թբիլիսիի գենետիկայի կենտրոնի բժշկական գենետիկ Լալի Մարգվելաշվիլին անդրադարձավ հազվագյուտ ժառանգական հիվանդությունների կրկնակի ախտորոշումներին, ԵՊԲՀ էնդոկրինոլոգիայի ամբիոնի պրոֆեսոր, «Մուրացան» համալսարանական հիվանդանոցային համալիրի էնդոկրին բաժանմունքի մանկական էնդոկրինոլոգ Մարիա Մելիքյանը խոսեց Մյունհաուզենի համախտանիշի մասին՝ կարևորելով «վստահի՛ր, բայց ստուգի՛ր» սկզբունքը։

Հայֆայում գործունեություն ծավալող մանկական էնդոկրինոլոգ, բժշկական գիտությունների թեկնածու Մարիա Կարևան հանդես եկավ «Ախտորոշիչ փակուղի. երբ գենետիկ և կլինիկական տվյալները չեն համընկնում» թեմայով զեկույցով։

Գործնական գիտաժողովը նոր տեխնոլոգիաներ և նոր հնարավորություններ բացահայտեց բժշկական գենետիկների, նյարդաբանների, էնդոկրինոլոգների, մանկաբույժների, գաստրոէնտերոլոգների, նեոնատոլոգների, ընտանեկան բժիշկների համար։

Հարցեր, պատասխաններ, մեկնաբանություններ