Ուլտրաձայնային հետազոտության հասանելիությանը նվիրված ուսուցողական դասընթաց Երևանում

Սեպտեմբերի 16-ին և 17-ին ԵՊԲՀ ուլտրաձայնային կենտրոնում անցկացվեց ուլտրաձայնային հետազոտության ուսուցման երկօրյա դասընթաց, որի նպատակն էր բժիշկներին ուսուցանել ուլտրաձայնային հետազոտման մեթոդը՝ կրիտիկական ախտաբանական վիճակների արագ ախտորոշման համար:

Դասընթացն անցկացնում էին Հարվարդի բժշկական դպրոցի առաջատար բժիշկները և  ԵՊԲՀ համալսարանական սրտաբանական  կլինիկայի բժիշկները,  որոնք նմանատիպ դասընթացներ իրականացրել են տարբեր երկրներում:

Ֆինանսավորման և աջակցության զգալի մասը տրամադրել է Հայ օգնության ֆոնդը  (ՀՕՖ):

Միջոցառմանը մասնակցում էին բժիշկներ մայրաքաղաքից, մարզերից և Արցախից:  Ներգրավված էին սրտաբաններ, ռեանիմատոլոգներ, արտակարգ իրավիճակում աշխատող բժիշկներ և ընդհանուր թերապևտներ:

Միջոցառման շրջանակում զրուցեցինք ԵՊԲՀ N 1 համալսարանական կլինիկայի ընդհանուր ինվազիվ սրտաբանության բաժանմունքի ղեկավար, Ուլտրաձայնային կենտրոնի տնօրեն,  բ.գ.դ․, պրոֆեսոր Հմայակ Սիսակյանի հետ:

«Սա չափազանց կարևոր դասընթաց էր: Միջոցառման նպատակն էր ուլտրաձայնը, մասնավորապես  էխոսրտասրտագրության հիմունքները, հասանելի դարձնել ռեանիմատոլոգների, թերապևտների, անհետաձգելի բաժանմունքի բժիշկների համար:  Անհրաժեշտ է հասնել այն բանին, որ այդ բժիշկների համար դյուրին լինի դրա կիրառումը: Ինչպես օրինակ, լսափողն է կիրառելի գրեթե բոլոր բժիշկների կողմից՝ թոքերը, սիրտն արագ լսելու համար: Նույն կերպ կարելի է թոքերի որոշակի ախտաբանությունների ժամանակ կիրառել նաև ուլտրաձայնը:

Այս դասընթացին նախորդել է մի քանի ամսվա տևողությամբ էլեկտրոնային՝ օնլայն տարբերակով ուսուցման մեկ այլ դասընթաց, որն կազմակերպվել էր նույն բժիշկների համար: Եվ արդեն մասնակից բժիշկները որոշ չափով ծանոթ են ուլտրաձայնային հետազոտության մեթոդին:  

Այս հետազոտման կիրառությունը կարևոր է հատկապես անհետաձգելի բժշկության մեջ (անհետաձգելի սրտաբանություն, ինտենսիվ թերապիայի բաժանմունքներ), որտեղ կարիք կա ուլտրաձայնի օգնությամբ արագ, օպերատիվ կողմնորոշվել ախտորոշման մեջ և այդ ախտորոշիչ ունակությունն արագ օգտագործել հիվանդին անհրաժեշտ օգնություն ցուցաբերելու համար:  Պատճառը նա է, որ շատ հիվանդությունների դեպքում ուլտրաձայնը բարձր կողմնորոշիչ, ախտորոշիչ նշանակություն ունի:

Պետք է, որ բժիշկները և հատկապես բժիշկների երիտասարդ սերունդը հետևեն այդ գործելակերպին: Ամբողջ աշխարհում այս ուղղվածությունը շատ տարածված է և ներդրված:  Հայաստանում դեռևս այն զարգացած չէ, որի պատճառով փորձում ենք աշխատել այդ ուղղությամբ:

ԱՄՆ-ում համալսարան ընդունվելիս ուսանողները ստանում են փոքր ուլտրաձայնային սարք` որպես նվեր: Բնականաբար, նրանք այդ սարքը կսկսեն կիրառել արդեն ուսման ընթացքում և աշխատելիս արդեն լավ կտիրապետեն հետազոտմանը: Մեզ մոտ հիվանդանոցներում փոքր ուլտրաձայնային սարքերի արագ կիրառման անհրաժեշտություն կա: Սակայն դա հնարավոր է միայն բժիշների վերապատրաստման և սարքերի  ձեռքբերման դեպքում:

Նման դասընթացերը շարունակական բնույթ են կրելու: Անհրաժեշտ է, որ տեղի բժիշկները սկսեն կիրառել այն, իսկ դրա համար շատ կարևոր է փոքր ուլտրաձայնային սարքերը մատչելի դարձնել բոլոր բժիշկների համար:

Զրուցեցինք նաև Բոստոնի Բեթ Իսրայել կենտրոնի անեսթեզիոլոգ և ինտենսիվ թերապիայի բժիշկ, բաժանմունքի ինտենսիվ թերապիայի ուլտրաձայնային հետազոտության ծրագրի ղեկավար Ախիկամ Օրեն Գրինբերգի հետ:

«Դասընթացի նպատակն է Հայաստանի գործընկերներին փոխանցել տարիների ընթացքում ձեռք բերած մեր գիտելիքն ու փորձը, որպեսզի նրանք ավելի պատրաստված լինեն և ունենան համապատասխան հմտություններ` շտապ և անհետաձգելի իրավիճակներում ուլտրաձայնային հետազոտություն իրականացնելու համար:

Կարծում եմ, որ մենք ապագայում կկարողանանք շարունակել նման դասընթացները և անգամ ավելի մեծամասշտաբ, բայց, միևնույն ժամանակ, հույս ունեմ, որ մեր վերապատրաստումից հետո մասնագետները կկարողանան ինքնուրույն աշխատել ու տեղական հիվանդանոցներում իրենց գործընկերներին սովորեցնել ուլտրաձայնային հետազոտություն:

Պետք է խոստովանեմ, որ մեր դասընթացի բոլոր կազմակերպիչները, ովքեր դասավանդում են ամբողջ աշխարհով շուրջ 12 տարի, չափազանց տպավորված են հայ բժիշկների գիտելիքով, պատրաստվածությամբ և նվիրվածությամբ: Կարծում եմ չենք ունեցել ուլտրաձայնային հետազոտության դասընթացներին ավելի պատրաստված բժիշկներ:

Հարցեր, պատասխաններ, մեկնաբանություններ