ԵՊԲՀ. Վերաբացված Ակնաբուժության ամբիոնում ուսումնական գործընթացը հավասարեցված է աշխարհի լավագույն համալսարաններին

ԵՊԲՀ ակնաբուժության ամբիոնի վերաբացումը հնարավորություն է ընձեռում առանձնացնել ուսանողների կրթական մասը, դասապրոցեսը և կլինիկական հատվածը:

Ակնաբուժության ամբիոնի նորընտիր վարիչ, բժշկական գիտությունների թեկնածու Լիլիթ Ոսկանյանի խոսքով` նոր վերանորոգված, անհրաժեշտ սարքերով համալրված ամբիոնի վերաբացված մասը թույլ կտա ապագա բժիշկներին դասերի ընթացքում առցանց դիտել «կենդանի վիրաբուժություն», որը շատ կիրառվող և ուսուցողական գործընթաց է:

Ուսանողները կարող են, վիրասրահին միանալով, կախված նրանից թե դասախոսը, ամբիոնի ղեկավարը այդ պահին ինչ ուսումնական նյութ են ներկայացնում,  հետևել վիրահատական ընթացքին:

Առցանց համակարգով ապագա մասնագետները հնարավորություն ունեն  հետևելու նաև Ս.Վ.Մալայանի անվան ակնաբուժական կենտրոն դիմած  (ամբիոնի կլինիկական բազաներից մեկն է) բուժառուների խորհրդատվություններին, հետազոտման ընթացքին:

«Բոլոր ուսանողները՝ յուրաքանչյուրն իր դասասենյակում, անցնում են համապատասխան ուսումնական նյութը: Դասախոսությունների համար ամբիոնում առկա է նաև դահլիճ, որը ևս հագեցած է ժամանակակից սարքավորումներով: Սա թույլ է տալիս նրանց առավել ինտերակտիվ ձևով ներգրավված լինել կլինիկական մթնոլորտում: Ամբիոնը վերջերս թարմացրել է նաև ուսումնական մուլյաժների քանակը, որոնց միջոցով սովորողներին ներկայացվում են աչքի տարբեր հիվանդություններ և դրանց վիրահատական ձևերը»,- մանրամասում է Լիլիթ Ոսկանյանը` հավելելով, որ կատարված նորարարություններն ու փոփոխություններն, առաջին հերթին, ուղղված են ուսումնական գործընթացի բարելավմանը և բացարձակապես հավասարեցված են աշխարհի լավագույն համալսարանների ակնաբուժության ամբիոնների աշխատանքներին:

Համալսարանական այս ամբիոնն արդեն գրեթե մեկդարյա պատմություն ունի, հիմադրվել է 1928 թվականին:

Վերաբացված ամբիոնում շարունակելու են տասնամյակների ընթացքում ձևավորված լավագույն ավանդույթները, որոնց  ստեղծման գործում կարևոր դերակատարում ունի Ս.Վ. Մալայանի անվան ակնաբուժական կենտրոնի հիմնադիր, պրոֆեսոր Ալեքսանդր Մալայանը:

Հարցեր, պատասխաններ, մեկնաբանություններ