ԵՊԲՀ սիմուլյացիոն կենտրոնը՝ «Վիրտուալ տեխնոլոգիաները բժշկության մեջ» ամսագրի էջերին

Սիմուլյացիոն ուսուցման ոլորտում մասնագիտացած ռուսական «Վիրտուալ տեխնոլոգիաները բժշկության մեջ» ամսագրի հերթական համարում տեղ է գտել Երևանի Մխիթար Հերացու անվան պետական բժշկական համալսարանի Սիմուլյացիոն ուսումնական կենտրոնի մասին հոդվածը։

Հեղինակավոր բժշկական ամսագրի հրապարակման մեջ, մասնավորապես, նշվում է, որ վերջին մի քանի տարվա ընթացքում ԵՊԲՀ-ն տարեկան խոշոր գումար է հատկացնում կենտրոնի հետագա հագեցման և մասնագետների ուսումնառության համար անհրաժեշտ բոլոր պայմանների ստեղծման ուղղությամբ։

 «Սիմուլյացիոն կենտրոնում վերապատրաստվում են բոլոր ֆակուլտետների առաջին կուրսի ուսանողները, Ընդհանուր բժշկության ֆակուլտետի չորրորդ, հինգերորդ և վեցերորդ կուրսերի ուսանողները: Այսօր համալսարանական սիմուլյացիոն կենտրոնի հագեցվածությունն ամբողջովին համապատասխանում է ժամանակակից պահանջներին, ինչը հատկապես արդիական է համավարակի պայմաններում, քանի որ բոլոր շփումները նվազագույնի են հասցված, իսկ վերապատրաստման մեկնել արտերկրի առաջատար բժշկական կենտրոններ դեռևս անհնար է», - ասվում է հոդվածում:

2014 թվականի դեկտեմբերի 22-ին ԵՊԲՀ-ում հիմնադրված Սիմուլյացիոն ուսումնական կենտրոնը բուհի ուսումնական գործընթացում տեսական գիտելիքները գործնականում կիրառելու բոլորովին նոր բարձրաձող էր:

Սիմուլյացիոն կենտրոնի միջոցով մեր բուհի կրթական համակարգում ներդրվեց բժշկական կրթության նոր մեթոդ՝ սիմուլյացիոն ուսուցում: Այսպիսի նորարարական կրթական մեթոդի ներմուծումը բժշկական կրթության թե՛ բուհական, թե՛ հետբուհական, ինչպես նաև շարունակական կրթության փուլերում թույլ է տալիս զարգացնել ուսանողների գործնական հմտությունները և նվազագույնի հասցնել բժշկական սխալների թիվը մասնագիտական գործունեության ընթացքում:

Հատկանշական է, որ Սիմուլյացիոն ուսումնական կենտրոնի ղեկավար, բ․գ․դ․ Սուրեն Հովհաննիսյանն ընտրվել է «Վիրտուալ տեխնոլոգիաները բժշկության մեջ» ամսագրի խմբագրական խորհրդի անդամ։  

2008 թվականին Ռուսաստանում հիմնադրված «Վիրտուալ տեխնոլոգիաները բժշկության մեջ» խորագրով բժշկական կրթության և կլինիկական պրակտիկայում վիրտուալ և սիմուլյացիոն տեխնոլոգիաների գիտական և գործնական ներկայացուցչական ամսագիրը միակ ռուսալեզու պարբերականն է աշխարհում, որը մասնագիտացած է այս ոլորտում։

Հարցեր, պատասխաններ, մեկնաբանություններ